«Ալիեւը երկու խնդիր ուներ եւ դրանք լուծեց իր համար: Նրա խնդիրն էր ցույց տալ, որ բանակցություններն ընթանում են նախկին՝ իր նախընտրած (առանց Արցախի լիարժեք կողմ լինելու)ձեւաչափով, եւ որ դրանք եղել են բանակցություններ: Կարծում եմ՝ Ադրբեջանն առաջիկայում կկոշտացնի դիրքորոշումը»,-«Մեդիա կենտրոն»-ում այսօր լրագրողների հետ հանդիպմանն անդրադառնալով օրերս կայացած Նիկոլ Փաշինյան-Իլհամ Ալիեւ առաջին պաշտոնական հանդիպմանը, ասաց քաղաքագետ Արա Պապյանը:
Մեկնաբանելով հանդիպումից հետո Ալիեւի այն հայտարարությունը, որ կողմերը պետք է նաեւ մարդասիրական նախաձեռնություններով հանդես գան, Պապյանը շեշտեց՝ հավանաբար, Ադրբեջանի նախագահը նկատի է ունեցել մարդկանց փոխանակումը. «Բայց քանի դեռ Ադրբեջանն իր քաղաքացիների համար չի հստակեցնում, որ քաղաքացու եւ զինվորի միջեւ տարբերություն կա, որ հումանիտար սկզբունքները պետք է պահպանվեն, հայկական կողմն ավելի պետք է շեշտի մարդասիրական իրավունքի ոտնահարման դեպքերը, այդ թվում՝ հայ քաղաքացիական անձանց սպանություններն ապրիլյան ռազմական գործողությունների ժամանակ, մեր զինվորների դիակների պղծումը»:
Ըստ Արա Պապյանի՝ մարդասիրական նախաձեռնության անվան տակ Ադրբեջանում հերթական սաֆարովյան գործողությունն են փորձում իրականացնել՝ ՀՀ քաղաքացի Կարեն Ղազարյանին փորձելով փոխանակել Արցախում դատապարտված եւ պատիժը կրող դիվերսանտների հետ. «Եթե այդպես լինի, մեր քաղաքացիական անձինք կհավասարվեն դիվերսանտների հետ, իսկ Ադրբեջանն իր քաղաքացիներին ուղերձ կհղի, որ պետք է գնալ-սպանել-մորթել: Ադրբեջանում շարունակվում է մարդասպանության հերոսացումը, ամեն հայ դիտարկվում է որպես թշնամի: Սա հակասում է ժողովուրդներին խաղաղության նախապատրաստելու կոչերին: Մեր քաղաքացի Կարեն Ղազարյանը հանցանք չէր գործել Ադրբեջանի դեմ՝ ի տարբերություն դիվերսանտների, որոնք մարդկանց են սպանել, այդ թվում՝ պատանու, որը զինվոր չի եղել»:
Այլ մանրամասները՝ տեսանյութում.
Կարդացեք նաև
https://www.facebook.com/aravot.am/videos/165313301040233/
Լուիզա ՍՈՒՔԻԱՍՅԱՆ
