ԵՊՀ ռեկտորի դեմ ԿԳ պաշտոնատարների կողմից չմարող քննադատության առիթով ցանկանում եմ հայտնել հետևյալը:
Արամ Սիմոնյանի հետ ծանոթ չեմ մոտիկից, սակայն նրա, որպես քաղաքացու մասին կարծիքս ձևավորվել է այն ժամանակ, երբ ներգրավվեցի հայրենասիրական գործընթացների, որի հովանավորն ու ջատագովն էր նա՝ ԵՊՀ ռեկտորը:
Համալսարանի պատերի ներսում և դրանցից դուրս նշվում էին զոհված համալսարանական ազատամարտիկների ծննդյան օրերը, մահվան տարելիցները, կազմակերպվում հարգանքի տուրքի այցելություններ Եռաբլուր և զոհվածների ընտանիքների բնակարաններ, համալսարան էին հրավիրվում զոհվածների ծնողներ: Ամառային արձակուրդներին Արկադի Տեր-Թադևոսյանի տրամադրած տարածքում կազմակերպված էր կիրակնօրյա դպրոց, ուսանողները լսում էին պատմաբանների դասընթացներ հայոց պատմության հերոսական էջերից, սովորում ռազմա-հայրենասիրական երգեր, ազգագրական պարեր:
Արամ Սիմոնյանի աջակցությամբ և Կոմանդոսի մասնակցությամբ (նաև ազգային հերոս Թաթուլ Կրպեյանի քրոջ և մի քանի մտավորականների) եղել են այցելություններ Արցախ՝ ծանոթանալու Արցախյան հերոսամարտիկների գործած սխրանքների պատմությանն ու անցած ուղուն:
Կարդացեք նաև
Այսօր ես ցանկանում եմ երախտագիտությունս հայտնել Արամ Սիմոնյանին իր այդ ազգասիրական քայլերի, հերոսացած ուսանողներին չմոռանալու, նոր սերնդին հայրենասիրական ոգով դաստիարակելու ջանքերի համար:
Սեղանիս է Սիմոնյանի վերջերս հրատարակված 1000-էջանոց մենագրությունը՝ «Զանգեզուրի գոյամարտը 1917-1921 թթ»:
Ռեկտորը հստակորեն պարզաբանել է, որ (այն ժամանակ ոչ իշխանական) ՀԿԿ անդամ դարձել է դեռևս 1997-ին Նժդեհի գաղափարախոսությանը համակրելու պատճառով և երբևէ կուսակցական որևէ գիծ չի տարել ԵՊՀ-ում իր պաշտոնավարման ընթացքում: ԵՊՀ-ն այսօր գտնվում է ֆինանսապես կայուն վիճակում՝ վերջին 6 տարիներին պատրաստվելով ներկա նվազ ընդունելության տարվանը: Երիտասարդական հիմնադրամին ԵՊՀ-ի ֆինանսական փոխանցումներ կատարվել էին իշխանությունների որոշմամբ, ինչպես, ասենք, ԳԱԱ-ի, ԳիտՊետկոմ-ի կողմից, որոնց ղեկավարները դրա համար այսօր բնավ չեն քննադատվում:
ԵՊՀ գիտխորհուրդը, ուսանողական խորհուրդը դեմ են արտահայտվել իրենց վրա արտաքին ճնշումներին և ուղղորդված ակցիաներին, հատկապես նախօրեին ԵՊՀ հոբելյանի, ինչին նույնպես համալսարանում հետևողականորեն պատրաստվել են վերջին տարիների ընթացքում:
Համարում եմ ԵՊՀ ռեկտորին ուղղված ոչ կառուցողական քննադատությունը վնասող վարչապետի վարած ժողովրդավարական քաղաքականությանը:
Նարինե ԱՐՇԱԿՈՒՆԻ
ՃԱՐՏԱՐԱՊԵՏ, ՃՇՀԱՀ-Ի ԴԱՍԱԽՈՍ, ՀԱՅԱՍՏԱՆԻ ՃԱՐՏԱՐԱՊԵՏՆԵՐԻ ՄԻՈՒԹՅԱՆ ԱՆԴԱՄ
