«Չենք կարող շտապել և միայն այս հայտարարությունը դիտարկելով ասել, որ առհասարակ նման օրակարգ չի եղել: Միայն այն փաստը, որ ինչ- որ բան նշված չէ այդ հաղորդագրության մեջ, չի կարող նշանակել, որ նման բան չի քննարկվել»,- «Զարկերակ» մամուլի ակումբում, անդրադառնալով Ալիև-Փաշինյան հանդիպման արդյունքներին և քննադատություններին, թե այդ հանդիպման ընթացքում չեն արծարծվել Վիեննայի, Սանկտ Պետերբուրգի և Ժնևի պայմանավորվածությունները, այսպես մեկնաբանեց Ադրբեջանի հարցերով փորձագետ Տարոն Հովհաննիսյանը:
Ըստ Տարոն Հովհաննիսյանի՝ հանդիպման կարևոր կետերից էր նաև հումանիտար ջանքերի մասին քննարկումը: Այս առիթով ասաց. «Չեմ հասկացել, թե ինչ հումանիտար ջանքերի մասին կարող է լինել խոսքը: Դա կարող է վերաբերել Ադրբեջանում պահվող հայազգի պատանդներին, օրինակ Կարեն Ղազարյանին, որին 20 տարի ազատազրկման դատապարտեցին կեղծ մեղադրանքներով»:
Դառնալով երկու հասարակություններին խաղաղության պատրաստելուն և այդ թեմայով քննարկումներին՝ Տարոն Հովհաննիսյանն ասաց. «Հայկական կողմը պահպանում է բոլոր նորմերը, բայց ադրբեջանական կողմը ՝ ոչ: Ադրբեջանի դասագրքերում կան բազմաթիվ հակահայկական, ատելության քարոզ պարունակող հայտարարություններ, որոնցով դաստիարակում են իրենց երեխաներին: Մանկապարտեզներում կազմակերպվում են բազում միոցառումներ, երբ այդ տարիքի երեխաները ինչ- որ ռազմաշունչ տեքստեր են արտասանում, խոսում պատերազմից: Խեղվում է հոգեբանությունը մանուկ տարիքից»:
Անդրադառնալով Վիեննայում կայացած Ալիև-Փաշինյան հանդիպումից հետո կողմերի գնահատականներին՝ Տարոն Հովհաննիսյանն ասաց. «Գնահատականները դրական էին, սակայն Ադրբեջանի նախագահը փորձեց իրենց ուղերձները ներդնել, որ բանակցային ձևաչափում փոփոխություն չեղավ. բանակցում են ՀՀ-ն ու Ադրբեջանը: Սա ընդամենը Ալիևի սուբյեկտիվ մեկնաբանությունն է: Չէինք էլ կարող կարծել, որ այս հանդիպման ընթացքում որոշում կկայացվի կամ լուրջ առաջխաղացում կգրանցվի: Եվ իմ սուբյեկտիվ կածիքով՝ սա ցույց տվեց, որ շատ մեծ առաջընթաց չկա. կողմերը շարունակում են պահել իրենց դիրքորոշում: Ուստի այս հանդիպումը մեծ փոփոխություն չբերեց»:
Կարդացեք նաև
Դառնալով ռազմական գործողությունների հավանականությանը՝ Տարոն Հովհաննիսյանն ասաց. «Ռազմական գործողությունների հավանակությունը միշտ կա: Կա հավանականություն, որ Ադրբեջանը կարող է դիմել ռազմական գործողությունների: Թե դա երբ կլինի, ոչ ես կարող եմ ասել, ոչ այլ ոք, քանի որ դա բազում գործոններից է կախված, և ոչ միշտ են դրանք օբյեկտիվ գործոններ: Այս պահին քանի դեռ բանակցություններն ընթանում են, պայմանավորվածութուններ են ձեռք բերվում, հավանակությունը ավելի ցածր է ռազմական գործողությունների: Սակայն Ադրբեջանի դիրքորոշումն առավելապաշտական է. կամ ամեն ինչ կամ ոչինչ»:
Տաթև ՀԱՐՈՒԹՅՈՒՆՅԱՆ
