«Դրանում տեսել եմ հանգամանքներ, որոնք իրավական գնահատականի անհրաժեշտություն ունեն: Դրանք հիմնավոր կլինեն քրեական գործ եւ քրեական հետապնդում հարուցելու համար, թե ոչ, արդեն ստուգողական գործողություններով ձեռք բերված փաստական տվյալները ցույց կտան»,-լրագրողների հետ զրույցում այսօր անդրադառնալով հարցին՝ «հնարավո՞ր է Պաշտպանության նախկին փոխնախարար Վահան Շիրխանյանի բաց նամակի հիման վրա նոր քրեական գործ հարուցվի», ասաց ՀՀ գլխավոր դատախազ Արթուր Դավթյանը: Թե ինչ հանգամանքների մասին է խոսքը, Դավթյանը չհստակեցրեց. «Ամենատարբեր: Դրանք հասանելի են համացանցում: Նամակում ինչ կա՝ ստուգվելու է: Ով ինչ ասի, որն իրավական գնահատականի անհրաժեշտություն կունենա, կստանա պատշաճ իրավական արձագանք»:
Հիշեցնենք, որ նամակում Շիրխանյանը Ռոբերտ Քոչարյանին մեղադրում է 1998թ.-ի նախագահական ընտրությունների կեղծման համար:
Նկատառմանն ի պատասխան, որ 1998թ.-ի նախագահական ընտրությունների կեղծման մասին բարձրաձայնել է ոչ միայն Վահան Շիրխանյանը, այլեւ Վազգեն Մանուկյանը, Լեւոն Տեր-Պետրոսյանը, Նիկոլ Փաշինյանը, Արթուր Դավթյանն ասաց. «Շատ բաներ կարող են ասված լինել: Եթե իրավական գնահատականի կարիք լինի, կարձագանքենք: Բովանդակությունը հիմնավոր պետք է լինի՝ իրավական գործընթաց սկսելու համար»:
Ինչ վերաբերում է Շիրխանյանի պնդմանը, թե Նաիրի Հունանյանը ԱԱԾ գործակալ է եղել, եւ այդ պնդման հիմքով Հոկտեմբերի 27-ի գործի վերաբացմանը, Արթուր Դավթյանն ընդգծեց. «Ավարտված վարույթներով պետք է նոր երեւան եկած հանգամանք լինի, որպեսզի նոր վարույթ սկսենք: Եթե որեւէ մեկին նման հանգամանք է հայտնի, հորդորում ենք մեզ հայտնել»:
Կարդացեք նաև
Արթուր Դավթյանը տեղեկացրեց, որ նամակի բովանդակությունն ուսումնասիրում է ԱԱԾ-ն:
Լուիզա ՍՈՒՔԻԱՍՅԱՆ
Ե՞ թե դժվար չէ ցուցակը,որը ներկայացվել է Ռ. Քոչարյանին՛ ներկայացրեք նաև հանրությանը: