«Հրաժարական չեմ տվել»,-լրագրողների հետ ճեպազրույցում այսօր անդրադառնալով առաջիկայում իր հնարավոր հրաժարականի մասին լուրերին՝ ասաց ՀՀ գլխավոր դատախազ Արթուր Դավթյանը: Հարցին՝ «կա՞ նման խոսակցություն, որովհետեւ ձեզ նախորդ՝ ՀՀԿ-ի թիմի ներկայացուցիչ են համարում», նա այսպես արձագանքեց. «Չգիտեմ, թե ով ինչ է համարում, բայց ես գլխավոր դատախազն եմ 2016թ.-ի սեպտեմբերից եւ մինչ այս պահը ձեր հետ շփվում եմ այդ կարգավիճակում»:
Հարցին՝ «նախկինում Նիկոլ Փաշինյանը ձեզ հաճախ էր «քուանշ»-ում, հիմա ինչպե՞ս լեզու գտաք նրա իշխանության հետ», գլխավոր դատախազը պատասխանեց. «Հաճախը ո՞րն է՝ մի քանի անգա՞մ, թե մի անգամ, բայց մի քանի թեմայով…Լեզու գտնել, կամ հարմարվել…սրանք տեղին եւ հասցեական հարցեր չեն: Ես ԱԺ-ի կողմից եմ ընտրվել որպես գլխավոր դատախազ եւ աշխատանքս իրականացնելիս խոչընդոտների չեմ հանդիպել, շարունակում եմ պարտականություններս կատարել: Որեւէ առիթով եւ իրավիճակում լեզու գտնել-չգտնելու, հարմարվել-չհարմարվելու խնդրի առաջ չեմ կանգնել»:
Լուիզա ՍՈՒՔԻԱՍՅԱՆ
