Կառավարության ծրագրի կատարման զեկույցի քննարկման ժամանակ ԲՀԿ պատգամավոր Արթուր Գրիգորյանը վարչապետ Նիկոլ Փաշինյանին հարցրեց՝ մամուլում հրապարակումներ կան, որ Ամուլսարի հետ կապված «Լիդիան» ընկերությունը դիմել է միջազգային արբիտրաժային դատարան ու բավականին լուրջ խնդիրներ առաջ քաշել:
Վարչապետը պատասխանեց. «Մեր հանրության մեջ, ավելի ճիշտ՝ մամուլում այդպիսի ընկալում կա՝ վայ «Լիդիանը» դիմում է միջազգային դատարան, վե՛րջ, կորանք ազգովի: Դիմում է՝ դիմում է, թող դիմի: Վաա՜յ, մեզ միջազգային դատարան են դիմել…ինչի մենք մեզ էդքան անպաշտպա՞ն ենք զգում: Էդ մի բանը կա, մեզ գալիս դիմում են, ասում են՝ մենք կդիմենք միջազգային դատարան ու երբ զգում են, որ չի ուշաթափվում Հայաստանի ներկայացուցիչը, ասում են՝ ո՞նց դուք մեզնից չե՞ք վախում, ո՛չ չենք վախում, ինչի՞ պիտի վախենանք, դուք մեզնից պիտի վախենաք, եթե վախենալու բան կա, ոչ թե մենք ձեզնից: «Լիդիանի» խնդրում մեր դիրքորոշումը հստակ է՝ մենք 300 հազար դոլար ենք հատկացրել բյուջեից, որ միջազգային բարձր հեղինակություն ունեցող ընկերություն գա՝ տալու մի պատասխան՝ արդյոք այն բնապահպանական ռիսկերը կարող են առաջանալ Ամուլսարի հանքի շահագործման պարագայում, դրանք կառավարելի՞ են, ընդունելի՞ են, թե՞ չէ: Եթե եզրակացությունը կլինի բացասական, կասվի, որ Ջերմուկի ջրային համակարգի եւ Սեւանա լճի համար ռիսկեր կան, ծրագիրն ընդհանրապես կփակվի, եթե կասվի, որ ռիսկերը մեծ չեն՝ ծրագիրը կաշխատի»:
Վարչապետն ասաց, որ հիմա չունեն որեւէ հենք, որի վրա որոշում կայացնեն:
Կարդացեք նաև
Հռիփսիմե ՋԵԲԵՋՅԱՆ
