«ԼՀԿ-ի առաջարկների փաթեթը եւս ԱԺ-ի հանձնաժողովում կքննարկվի: Մեր գործընկերներն ունեն հնարավորություններ առաջարկներ ներկայացնելու, իսկ մենք՝ կառավարությունը, բաց ենք քննարկումների համար»,-լրագրողների հետ ճեպազրույցում այսօր անդրադառնալով կառավարության կառուցվածքի փոփոխությունների վերաբերյալ «Լուսավոր Հայաստան» կուսակցության առաջարկներին, որոնք հրապարակվեցին այսօր, ասաց ՀՀ փոխվարչապետ Տիգրան Ավինյանը։
ԼՀԿ-ն նաեւ առաջարկել էր ՀՀ ոստիկանությունը եւ Ազգային անվտանգության ծառայությունը վերածել նախարարությունների: Ավինյանը սրա հետ այնքան էլ համաձայն չէ. «Համոզված չեմ, որ նախարարության տեսքով այդ կառույցներն արդյունավետ կաշխատեն: Ամեն դեպքում, մենք բաց ենք տրամաբանական՝ հիմնավորված առաջարկների համար»:
Փոխվարչապետը համաձայն չէ նաեւ ԼՀԿ-ի այն տեսակետի հետ, որ եթե նշյալ կառույցները չլինեն նախարարություններ, խորհրդարանի առաջ չեն կարող բավարար չափով հաշվետու լինել: Որպես ասածի հավաստիացում՝ Տիգրան Ավինյանը շեշտեց. «Վերջերս ԱԱԾ տնօրենն աննախադեպ մասնակցություն ունեցավ ԱԺ Պաշտպանության և անվտանգության հանձնաժողովի նիստին: Դա վերջին 10 տարում երեւի… չգիտեմ՝ եղե՞լ է այդպիսի բան: Այսինքն՝ ԱԺ-ն ունի վերահսկողական լծակներ այդ կառույցների հանդեպ»:
Լուիզա ՍՈՒՔԻԱՍՅԱՆ
