«Հայաստանի Հանրապետությունում երբեմն չեն նկատում, որ օրինակ, մեր երկրից դուրս է մղվել ընտրություններ կեղծել հասկացությունը: Հնդկական առածը կա՝ այն ի՞նչն է ինչը, որին չես նկատում, քանի դեռ չի հեռացել, ըստ առածի, դա առողջությունն է: Դա նաեւ ժողովրդավարությունն է, ազատ ընտրություններն են»,- ԱԺ-ում կառավարության ծրագրի իրականացման ընթացքի մասին զեկույցի քննարկման ժամանակ ասաց վարչապետ Նիկոլ Փաշինյանը:
Նա ասաց՝ «Սկսած 2018-ի մայիսից նախկին խորհրդարանական մեծամասնության ներկայացուցիչները թաշկինակներն առած լացեր էին դնում ԵԽԽՎ միջանցքներում, որ վա՜յ, մեզ այստեղ հետապնդում են, հալածում են, չգիտեմ ինչ են անում: Նրանք համարում էին, որ այն մանիպուլյացիաները, որ նրանց հաջողվել է անել իշխանության տարիներին, որ ամենասուր հարցերը ծռեն, դզեն, փչեն, հիմա էլ հաջողվելու է հակառակ գործընթացն անեն: Ուրախ եմ արձանագրել, որ ընդամենը երկու օր առաջ հրապարակվեց ԵԽԽՎ Հայաստանի համազեկուցողների հաղորդագրությունը ՀՀ կատարած այցի, Երրորդ հանրապետության պատմության մեջ առաջին անգամ է, որ համազեկուցողները գալիս են եւ զրո պրետենզիա, զրո կասկած ՀՀ-ում տեղի ունեցող փոփոխությունների վեկտորի նկատմամբ: Սրանք բաներ են, որ չեն նկատվում, ինչպես չի նկատվում առողջությունը»:
Փաշինյանը նաեւ ասաց, որ 3 անգամ կրճատվել է քաղաքական ապաստան խնդրող ՀՀ քաղաքացիների թիվը:
Հռիփսիմե ՋԵԲԵՋՅԱՆ
