«Կարծում եմ՝ «դուռ փակելը» վերաբերում է առհասարակ կրթական միջավայրին, բուհի ներսում եղածին: Արատավոր երեւույթներ են եղել, եւ ես ինքս էլ ենթարկվել եմ ճնշումների»,-լրագրողների հետ զրույցում այսօր անդրադառնալով վարչապետ Նիկոլ Փաշինյանի՝ «ուսանողի առաջ դուռ փակած ռեկտորը չի կարող պաշտոնավարել» հայտարարությանը, ասաց «Իմ քայլը» խմբակցության պատգամավոր, ԿԳ նախկին փոխնախարար Հովհաննես Հովհաննիսյանը:
«Վարչապետի ասածը վերաբերում էր ոչ թե մեկ բուհի, այլ բուհական համակարգին առհասարակ»,-համոզմունք հայտնեց Հովհաննես Հովհաննիսյանը:
Ըստ նախկին փոխնախարարի՝ վարչապետը նշյալ հայտարարությամբ բոլոր բուհերին հորդորել է սթափ լինել. «Նախկինում եղած արատավոր երեւույթները չպետք է կրկնվեն, երբ համակարգը ծառայում էր մեկ քաղաքական շահի: Երբ որեւէ քննադատական հարցազրույց էր հրապարակվում, համապատասխան տեղերից զանգում էին բուհ եւ հորդորում չքննադատել»:
Լուիզա ՍՈՒՔԻԱՍՅԱՆ
