Պաշտպանության նախկին փոխնախարար Վահան Շիրխանյանի՝ ՀՀ երկրորդ նախագահ Ռոբերտ Քոչարյանին ուղղված բաց նամակի առնչությամբ ՀՀ հատուկ քննչական ծառայությունում այս պահին քրեական գործ հարուցված չէ: Այս մասին Aravot.am-ի հարցմանն ի պատասխան տեղեկացրեց ՀՔԾ մամուլի խոսնակ Մարինա Օհանջանյանը: «Նյութեր են նախապատրաստվում միայն 1998թ.-ի ընտրությունների կեղծման դրվագով, իսկ նամակում մատնանշված մյուս հանգամանքները մեր իրավասության տիրույթում չեն»,-նշեց Մարինա Օհանջանյանը:
Ինչ վերաբերում է հարցին՝ «Վահան Շիրխանյանը հարցաքննվե՞լ է, թե ոչ», Մարինա Օհանջանյանը պատասխանեց, որ այս պահին ՀՔԾ-ն այլ մանրամասներ հրապարակել նպատակահարմար չի գտնում:
Հիշեցնենք, որ բաց նամակում Վահան Շիրխանյանը դիմել էր ՀՀ երկրորդ նախագահ Ռոբերտ Քոչարյանին՝ ասելով. «1998թ. 30-ը մարտի, նախագահական ընտրությունների 2-րդ փուլ։ Բացառապես Վազգեն Սարգսյանի խոսքին տրված 27 տոկոս քվեն դարձրիր քեզ համար 59 տոկոս և քեզ հռչակեցիր ՀՀ նախագահ։ Իսկ 73 տոկոս ստացած Կարեն Դեմիրճյանին «մեծահոգաբար» տվեցիր 41 տոկոս՝ խոստանալով նաև վարչապետի պաշտոնը՝ Վազգենի պահանջով։ Եվ, իհարկե, խաբեցիր, ինչպես միշտ»:
Լուիզա ՍՈՒՔԻԱՍՅԱՆ
