«Փաշինյանն այդ մասին ասել է դեռեւս օգոստոսին: Պարկուճները փոխվել են, թե ոչ, կպարզվի քննության արդյունքում»,-«Հայելի» մամուլի ակումբում լրագրողների հետ հանդիպմանն այսօր անդրադառնալով վարչապետ Նիկոլ Փաշինյանի՝ օրերս մամուլի ասուլիսում հնչեցրած հայտարարությանը, ասաց Մարտի մեկի գործով ՀՀ սահմանադրական կարգը տապալելու համար մեղադրվող երկրորդ նախագահ Ռոբերտ Քոչարյանի շահերի պաշտպան, փաստաբան Հայկ Ալումյանը:
Հիշեցնենք՝ օրերս Փաշինյանն ասել էր, որ ըստ վարկածներից մեկի՝ մարտիմեկյան իրադարձությունների ժամանակ կրակված գնդակների պարկուճները փոխվել են, քանի որ քննչական մարմնում իմացել են, թե ովքեր են սպանողները (մարտի մեկի զոհերի մասին է խոսքը):
«Եթե Փաշինյանը նկատի ունի, որ պարկուճները փոխելու արդյունքում էլ հնարավոր չէ սպանողներին բացահայտել, չպետք է ասի, որ Մարտի մեկի գործն ամբողջությամբ բացահայտված է: Մեր իրավապահ մարմինները հսկա փորձ ունեն սպանություն բացահայտելու՝ անգամ այն դեպքում, երբ պարկուճ չկա: Շատ սպանություններ բացահայտվում են անգամ առանց պարկուճի եւ տեսանյութերի: Իսկ այստեղ կան փաստեր, այդ թվում՝ պարկուճներ եւ տեսանյութեր»,-համոզմունք հայտնեց Հայկ Ալումյանը:
Նրա խոսքով՝ եթե անգամ Մարտի մեկի զոհերից մեկի սպանությունը բացահայտված չէ, վարչապետը չպետք է ասի, թե Մարտի մեկի գործը բացահայտված է. «Ավելի լավ է ասել, որ լեզվի սայթաքում է եղել»:
https://www.facebook.com/aravot.am/videos/1785162771584930
Լուիզա ՍՈՒՔԻԱՍՅԱՆ
