«Հայաստանի Հանրապետությունում համակարգային կոռուպցիա չկա: Կան որոշ մարդիկ, որոնք օգտագործելով իրենց պաշտոնական դիրքը, փորձում են օգտվել բարիքներից, բայց մենք աչալուրջ ենք եւ հավաստիացնում ենք բոլորին, որ ցանկացած նման դեպք, անկախ նրանից՝ ում կողմից կիրականացվի, կարժանանա մեր շատ խիստ մոտեցմանը»,- այսօր ԱԺ պաշտպանության հանձնաժողովում ասաց ԱԱԾ տնօրեն Արթուր Վանեցյանը:
Նա ասաց, որ երբեւէ ԱԱԾ-ն այսքան ժողովրդական աջակցություն չի վայելել, դրա խոսուն վկան է նաեւ քաղաքացիներից ծառայությանը հասցեագրվող դիմումների, բողոքների շեշտակի ավելացումը: Նա ասաց, որ ԱԱԾ-ին դիմում են անգամ այն հարցերով, որոնք իրենց գործառույթների մեջ չեն մտնում:
Վանեցյանը նշեց, որ շատ դեպքերում կոռուպցիան կրել է համակարգային բնույթ, եղել է բրգաձեւ, ազդել հարկերի հավաքագրման վրա, բացասական ազդեցություն ունեցել ընտրական գործընթացների, ներդրումների, պետության միջազգային վարկանիշների վրա, իսկ այսօր առկա է կոռուպցայի դեմ անհաշտ պայքար, կա քաղաքական կամք:
ԱԱԾ պետն ասաց, որ ԱԱԾ դեպարտամենտում քննվող քրգործերով մինչ օրս վերականգնվել է միլիարդավոր դրամների հասնող վնասներ. «Դա ընդամենը սկիզբն է»: Կոռուպցիոն բնույթի գործերի մասին խոսելիս՝ Վանեցյանն ասաց, որ ՀՀ պետական բյուջեին հասցվել է շուրջ 32 մլրդ 100 մլն դրամի վնաս, առայժմ այդ վնասներից վերականգնվել է շուրջ 22 մլրդ-ը:
Բացի այդ՝ այս պահին ԱԱԾ-ի կողմից ստուգվում է 235 մլրդ դրամի շրջանառություն. «Առաջիկայում կունենանք հիմնավորումներ, թե դրանց որ մասն է ապօրինի ձեռք բերված գումարներ, որ մասն է կոռուպցիոն»:
Հռիփսիմե ՋԵԲԵՋՅԱՆ
