ԱԱԾ տնօրեն Արթուր Վանեցյանն այսօր ԱԺ-ում էր եւ լրագրողները նրանից հետաքրքրվեցին Նաիրի Հունանյանի՝ ԱԱԾ գործակալ լինելու մասին, ինչը պնդել էր Վահան Շիրխանյանը: Վանեցյանը պատասխանեց. «Այո, տեղեկություն ունեմ, բայց ես ոչ կհերքեմ, ոչ էլ կհաստատեմ պարոն Շիրխանյանի տեղեկությունը: Գործը վարող մարմին կա՝ ՀՔԾ-ն է, խնդրում եմ բոլոր հարցերով դիմել ՀՔԾ-ին: ՀՔԾ-ն երբ անհրաժեշտություն կլինի, այդ հարցին կպատասխանի»:
Վանեցյանը տեղեկացրեց, որ գլխավոր դատախազությունը Շիրխանյանի նամակն ուղարկել է իրենց եւ ոստիկանություն եւ հիմա ուսումնասիրում են, եթե կլինեն փաստեր, որոնք հիմք կտան վերաբացել Հոկտեմբերի 27-ի գործը, կամ հարուցել նոր գործ, կլինի:
Հարցին՝ Նիկոլ Փաշինյանն ասել էր, որ ՀՀ-ում կան քաղաքական գործիչներ, որոնք ավելի շատ գործակալներ են, քան քաղաքական գործիչներ, ինչպե՞ս կմեկնաբանեք՝ Վանեցյանն ասաց, որ ամեն բան չէ, որի մասին կարող են խոսել:
Անդրադառնալով կոռուպցիայի դեմ պայքարին՝ հարցին, որ Նիկոլ Փաշինյանը դժգոհ է, վերջին շրջանում բացահայտումներ չկան՝ Վանեցյանն ասաց. «Ես էլ եմ դժգոհ իրավապահ համակարգի, ԱԱԾ-ի աշխատանքից: Այո, այն տեմպը եւ աշխատանքները, որոնք իրականացրել են մեր գործունեության սկզբնական շրջանում, իհարկե, տեսնում եք, որոշակի նվազում կա: Դա բացատրվում է նրանով, որ իրավական հիմքերը պետք է լինեն շատ ամուր, որպեսզի մեր կատարած որեւէ գործ հնարավոր չլինի շահարկել ու ասել, որ մենք գործել ենք քմահաճույքով: Մենք գործում ենք օրենքով ու փորձում ենք անել ամեն ինչ, որ օրենքի պահանջը կատարենք»: Վանեցյանը վստահեցրեց, որ նոր հնչեղ բացահայտումներ կլինեն:
Պատգամավոր Արմեն Խաչատրյանը ոստիկանությանը գաղտնալսելու հնարավորություն տալու մասին օրենքի նախագիծ ունի, հարցին՝ ԱԱԾ-ն ո՞նց է վերաբերում այդ նախագծին՝ Վանեցյանը պատասխանեց, որ կապուղիները ԱԱԾ-ն է տրամադրում գաղտնալսելու ու դա ճիշտ է, պետք է պահպանվի. «Կլինի քննարկում ԱԺ-ում, եթե այդ նախաձեռնությունը դառնա օրենք, մենք կենթարկվենք»:
Հռիփսիմե ՋԵԲԵՋՅԱՆ
