Միջազգային հանրության միանշանակ դիրքորոշումը, որը արտացոլում է բանակցային գործընթացի ձևաչափի անփոփոխ լինելը, լուրջ ազդանշան է Հայաստանի համար: Այս մասին, ինչպես հաղորդում է Trend-ը, ասվում է Ադրբեջանի ԱԳՆ մեկնաբանության մեջ՝ ի պատասխան Հայաստանի վարչապետ Նիկոլ Փաշինյանի հայտարարության, որ «Լեռնային Ղարաբաղին բանակցությունների սեղանի շուրջ հրավիրելու առաջարկը ոչ թե ձևաչափի փոփոխության առաջարկ է, այլ բանակցային ձևաչափի վերականգնման»:
Ադրբեջանի ԱԳՆ մեկնաբանության մեջ նշվում է, որ Փաշինյանի այդ հայտարարությունը «պարզաբանման է ենթակա, քանի որ չկա այնպիսի փաստաթուղթ կամ որոշում, որոնք կարող են ամրապնդել դրա հիմնավոր լինելը»:
«Այս կապակցությամբ դարձյալ հարկ է նշել ԵԱՀԿ Մինսկի խմբի համանախագահների վերջին հայտարարությունը, որում նրանք միանշանակ հանդես են գալիս բանակցային գործընթացի ձևաչափի անփոփոխ լինելու օգտին: Նմանատիպ հայտարարություններով հանդես են եկել նաև Եվրամիության բարձրաստիճան պաշտոնյաներ: Միջազգային հանրության այդ դիրքորոշումը լուրջ ազդանշան է Հայաստանի համար, ինչպես նաև վկայում է Ադրբեջանի հիմնավորված դիրքորոշման աջակցության մասին»,- ասվում է մեկնաբանության մեջ:
Պատրաստեց՝ Վիկտորյա ԱՆԴՐԵԱՍՅԱՆԸ
