Այսօր Երեւանի ընդհանուր իրավասության դատարանում` Մեսրոպ Մակյանի նախագահությամբ Գագիկ Ծառուկյանի թիկնազորի նախկին պետ, ԲՀԿ խմբակցության պատգամավոր Էդուարդ Բաբայանի գործով առաջին դատական նիստն էր: Հիշեցնենք, որ մեղադրական եզրակացության համաձայն, Էդուարդ Բաբայանը 2018-ի հուլիս 2-ին «Օլիմպավան» մարզական համալիրի հանդիպումների դահլիճում հարվածներ է հասցրել Վյաչեսլավ Հարությունովին՝ առողջությանը դիտավորությամբ պատճառելով ծանր վնաս։ Էդուարդ Բաբայանը սկզբում կալանավորվեց, հետո՝ օգոստոսի 21-ին, 20 մլն դրամ գրավի դիմաց ազատ արձակվեց:
Մինչ դատական նիստը կսկսեր, լրագրողների հարցին ընդունո՞ւմ եք ձեզ առաջադրված մեղադրանքը՝ Բաբայանը պատասխանեց՝ իհարկե, չեմ ընդունում:
Դատական նիստի ընթացքում թույլ չտրվեց 5 րոպեից ավելի տեսանկարահանումներ անել, քանի որ տուժող կողմն առարկեց: Նիստում Էդուարդ Բաբայանը, ներկայացնելով իրեն, ասաց որ իր խնամքի տակ 3 չափահաս երեխա ունի: Ուշագրավ է, որ գործով տուժող ճանաչված Վյաչեսլավ Հարությունովը դատարանում հայտարարեց, որ իրեն տուժող չի ճանաչում: Դատավորը հիշեցրեց, որ նրան տուժող է ճանաչել նախաքննական մարմինը:
Հռիփսիմե ՋԵԲԵՋՅԱՆ
Լուսանկարը՝ «Փաստինֆո»-ի
