Հայաստանի ազգային ֆիլհարմոնիկ նվագախմբի (գեղարվեստական ղեկավար՝ Էդուարդ Թոփչյան) հրավերով հայրենիք ժամանած 30-ամյա աշխարհահռչակ թավջութակահար Նարեկ Հախնազարյանը «Առավոտի» հարցին, թե մեզ անհրաժե՞շտ է մշակութային հեղափոխություն, պատասխանեց. «Հայաստանի նման փոքր երկրի ներկայի եւ ապագայի այցեքարտը մշակույթն է: Օրինակ, մեր դասական կոմպոզիտորներից բացի, աշխարհում հնչում են ժամանակակից հեղինակների ստեղծագործություններ՝ ոչ միայն հայազգի, այլեւ օտար երաժիշտների մեկնաբանմամբ: Այսօր հատկապես հայկական վոկալ արվեստի բում է… Փոքր երկրի համար սա միանշանակ հիանալի արդյունք է»: Երաժիշտը սեփական օրինակով փաստեց 2018թ. Համբուրգում Հայաստանի պետական սիմֆոնիկ նվագախմբի (գեղարվեստական ղեկավար՝ Սերգեյ Սմբատյան) հետ Էդվարդ Հայրապետյանի կոնցերտի կատարումը: Ասաց, որ Վաշինգտոնում 2020թ. հանդես կգա Վաչե Շարաֆյանի կոնցերտի կատարմամբ… Կանխելով Կոմիտասի 150-ամյակին նվիրված իր ծրագրերի մասին հարցը, հայտնեց, որ պարբերաբար իր մենահամերգների ավարտին, հանդիսատեսի ծափողջույններին ի պատասխան՝ կատարել է Կոմիտաս:
Անդրադառնալով իր գերխիտ գրաֆիկին էլ՝ երաժիշտը վկայակոչեց էքստրեմալ պայմաններում Բոստոնի՝ իր բարեգործական համերգը, որի հասույթը փոխանցվել է քեսապահայությանը:
ՍԱՄՎԵԼ ԴԱՆԻԵԼՅԱՆ
«Առավոտ» օրաթերթ,
20.03.2019
