Շարմազանովը վստահեցնում է՝ Փաշինյանի իշխանության գնացքը օր օրի իշխանության ու լեգիտիմության կանգառից հեռանում է
«Հին համակարգի բովանդակային մնացորդները Հայաստանում որեւէ անելիք չունեն, ուզում է միլիոն ծախսեն, ուզում է՝ միլիարդ», – երեկ հրավիրած ասուլիսում հայտարարեց վարչապետ Նիկոլ Փաշինյանը:
«Առավոտի» հետ զրույցում արձագանքելով Փաշինյանի այս եւ այլ հայտարարություններին՝ ԱԺ նախկին փոխխոսնակ, ՀՀԿ խոսնակ Էդուարդ Շարմազանովն ասաց. «Հին համակարգի ջատագովներն իր կողքերն են, աջուձախ թող նայի ովքեր են, նրանք այսօր իր թիմակիցներն են, ով որ մի օրով դավաճանեց, իր մոտ սրբացվե՞ց: Հլը թող մի հատ կողքերը նայի, մարդիկ կան՝ կոմունիզմից մինչեւ հիմա իշխանություն են: Հին համակարգ… էդ ինքը նոր համակարգի ծնո՞ւնդ է, հին համակարգում չի՞ Փաշինյանն ընտրվել պատգամավոր: Ո՞ւմ օրոք է ինքն ընտրվել: Էդ որ հին համակարգն էդքան վատն էր, ո՞նց ինքը դառավ խմբակցության ղեկավար, ո՞նց թավշյա հեղափոխություն արեց: Բա ասում են՝ երկիրը ավտորիտար է, ավտորիտար երկրում էդ ո՞վ կթողեր, որ դու ծիկ անեիր: Ես Փաշինյանին խորհուրդ կտամ գործով զբաղվի, բարեփոխումներ անի, ժողովրդի կյանքը լավացնի, ոչ թե հերթական տեսարաններն անի: Էլի ինքը փորձում է ներքին թշնամիներ փնտրել, նախկիններին հիշել, նախկինները, որ շատ լավը լինեին՝ հիմա իշխանության կլինեին: Լավ, մի տարի է՝ ինքն է, ի՞նչ է արել դրական բան, որեւէ լավ բան չի արել: Գնում է Գումի շուկա, պոմիդորի գինն է հարցնում, հաջորդ օրը պոմիդորը թանկանում է, գնում է Արարատի մարզ, գոնե գյուղացու պրոբլեմները լուծի, գալիս ոտանավոր է գրում, ի՞նչ է լուծել Փաշինյանը, ի՞նչ է արել»:
Մենք փոխանցեցինք՝ ասուլիսում Փաշինյանը թվարկել է, թե վերջին 10 ամիսներին քաղաքացիների վիճակն ինչպես է բարելավվել. «200 հազար մարդու աշխատավարձերը բարձրացրել ենք, 85 հազար մարդու նպաստները բարձրացրել ենք, հիփոթեքային վարկավորման հարյոր տոկոսանոց աճ է տեղի ունեցել, դա մարդկանց սոցիալական վիճակի բարելավման ցուցի՞չ է, թե՞ չէ: 2019-ի հունվարին ՀՆԱ-ն 19 տոկոսանոց աճ է արձանագրել, դա ցուցի՞չ է, թե՞ ցուցիչ չի»: Շարմազանովն արձագանքեց. «Ոչ մեկի աշխատավարձն էլ չի բարձրացել, թող հեքիաթներ չպատմի, մարդիկ ավելի վատ են ապրում, ներդրումներ չկան: Գազի գինը բարձրացրել է, սահմանին գազը թանկացել է: Մի հատ ներդրումային ծրագիր թող ասեն, որ Հայաստանում արվել է: Ասում էին՝ ԱԺ-ն կցրվի, սփյուռքահայերով սաղ կգան, ներդրում կանեն, մի հատ ներդրում թող ասեն, որ արել են: Քանի՞ տոկոս տնտեսական աճ է ասել, 4.9 տոկոսով ո՞ր երկրում են տնտեսական հեղափոխություն անում: Երբ որ մենք գնացել ենք, 9,7 է եղել»:
Փաշինյանն ասուլիսում խոսելով հին համակարգի, նախկին իշխանավորների մասին՝ ասաց. «Մարդիկ պետք է հասկանան, որ իրենց գնացքը արդեն գնացել է ու եթե հետեւից փորձեն ֆեռառիով էլ հասնեն՝ չեն հասնելու, որովհետեւ իրենց էջը վաղուց փակված է: Իրենք մի ճանապարհ ունեն՝ կանգնեն ժողովրդի առաջ, ապաշխարեն ու ժողովրդից ներում հայցեն, ուրիշ անելիք ՀՀ-ում չունեն»: Շարմազանովը պատասխանեց. «Մեզ ապաշխարելու խորհորդներ տալու փոխարեն դու գնա ապաշխարի, որ 11 ամիս շարունակ խաբել եք: Խոստումների մի քանիսն ասեմ՝ ապրիլի 19-ին կանգնեց Հանրապետության հրապարակում ասեց՝ պետական աշխատողների աշխատավարձը պիտի բարձրացնեմ, որպեսզի շաբաթ-կիրակի բետոն չթափեն: Հիմա ես հարց եմ տալիս՝ պետական աշխատողներից որեւէ մեկի աշխատավարձը բարձրացե՞լ է՝ բացի փաշինյանական պրեմիաներից՝ միլիոնավոր դրամներից: 5 նախարարությունների աշխատակիցների մի մասն արդեն կրճատվել է ու եթե նախկինում շաբաթ-կիրակի էին մենակ բետոն թափում, Փաշինյանի ապաշնորհ կառավարման արդյունքում երկուշաբթիից կիրակի են թափում, հացի փող չունեն: Փաշինյանը թող իրեն Զեւսի տեղ չդնի ու որոշի՝ ով պիտի քաղաքականությամբ զբաղվի, ով պիտի չզբաղվի, ում գնացքը գնացել է, ում գնացքը չի գնացել: Ես մենակ մի բան կարող եմ ասել, որ Փաշինյանի իշխանության գնացքը օր օրի իշխանության ու լեգիտիմության կանգառից հեռանում է: Ճտերին աշնանն են հաշվում, եթե ինքը այսպես շարունակի, արժանանալու է այն ճակատագրին, որն ի սկզբանե գրված է եղել այն քաղաքական գործիչների համար, որոնք տառապել են մեծամտությամբ եւ ոչ շրջահայացությամբ»:
Շարմազանովը Փաշինյանի նոր համակարգի բացթողումները մատնանշեց. «Ո՞րն է նոր բերած համակարգը՝ Վազգեն Սարգսյանի 60-ամյակին ուղերձ չհղելը, պառլամենտում Վազգեն Սարգսյանի ծնունդին մի րոպե լռությամբ չնշելը՞, ո՞րն է նորը, որ խաբի ասի կարմիր գծերը պիտի հանենք, բայց չհանի՞, որ խաբի ասի տեսախցիկները պիտի հանենք, սերդեչնի պրիվետ օտ Զիմզիմովա, բայց չհանի՞, որ ասի՝ թոշակ պիտի բարձրացնեմ, բայց չբարձրացնի՞, որ ասի աղքատությունը պիտի նվազի, բայց բարձրացնի՞, որ Ղարաբաղի հարցում պրոբլեմների առա՞ջ կանգնենք, սա՞ է նոր համակարգը: Հենց տեսնում է ձախողվում է, հակահեղափոխություն է հիշում, ո՞վ ասեց, ախպեր ջան, դու իշխանություն ես, բարեփոխումներ արա, կարո՞ւմ ես՝ վիճակը լավացրա ու աչքս կոխի, ասա ա՛յ Շարմազանով, այ էստեղ լավ բան եմ արել: Ուզում են Ֆեռառիով գալ… քեզ ո՞վ է ասել մենք ուզում ենք գանք, եկողն էլ, չեկողն էլ ընտրություններին կերեւա: Ես այո, իմ դաշնակիցների քանակն ավելացնելու եմ, ասել եմ՝ Հայկը պիտի հաղթի Բելին: Ոնց որ ֆուտբոլում մի հատ թիմ պարտվի, հենց ասես խի ես պարտվել, ասի՝ դե լավ ա, տասը տարի առաջ էլ դու ես պարտվել, այ քեզի բա՜ն»:
Ըստ Շարմազանովի, Նիկոլ Փաշինյանը անկարող է դիմակայել երկրի առջեւ եղած մարտահրավերներին. «Չեմ ասում վատ մարդ է, մեր թաղի Սերոժն էլ է լավ մարդ, ի՞նչ կապ ունի: Ասուլիսներ անելով, սելֆիներ անելով, ծաղիկներ բաժանելով, լայվեր մտնելով՝ երկիր չեն կառավարում: բոլոր ոլորտներում ինքը չի հասել իր խոստացածին: Մի հատ էլ կանգնում ասում է՝ Հայաստանում դժգոհություն չկա, ամեն ինչ լավ է: Դժգոհություն չի նշանակում փողոց պիտի դուրս գան, ես միշտ էլ դեմ եմ եղել փողոցով իշխանազավթմանը»:
Մեր դիտարկմանը՝ Փաշինյանը չի ասում, որ դժգոհողներ չկան, ասում է՝ դժգոհողները այն «տասնավորները, հիսնավորներն են», որոնց միջոցով հարցեր են ժամանակին լուծվել, հիմա այդ օղակին չեն դիմում, դրա համար էլ դժգոհում են՝ Շարմազանովը պատասխանեց. «Օրինական 30 տոկոս պառլամենտական ընտրություններին իրենց ձայն չեն տվել, այսինքն, իրենցից դժգոհ են: Բնակչության մեծ մասը ընտրության չի գնացել: Ինչի՞ պիտի գոհ լինեն, արտաքին քաղաքականությունում խայտառակ ցուցանիշներ, ներքին քաղաքականությունում՝ նույնը: Մայիսի՞ն էր Փաշինյանի լեգիտիմությունը ավելի բարձր, թե՞ այսօր»:
Երբ ասացինք, որ Փաշինյանը գտնում է, որ եթե այսօր ընտրություններ անեին, «Իմ քայլը» ավելի շատ ձայն կհավաքեր՝ Շարմազանովը հակադարձեց. «Բա որ այդպես է, էդ խի՞ ամեն ինչ արեցիր, որ ԱԺ-ն ցրվի, խի՞ ժողովրդին բերեցիր ԱԺ-ի վրա, խի՞ պաշարեցիր ԱԺ-ն, ինչի՞ էիր վախենում, որ առավոտից իրիկուն սաղին ասֆալտին փռելու կոչեր էիր անում: Դե թող մի հատ բախտը փորձի՝ ընտրություն անի: Մայիսին թող դնի ընտրություն, տեսնենք կհավաքե՞ս էդքան, թե՞ չէ»:
ՀՌԻՓՍԻՄԵ ՋԵԲԵՋՅԱՆ
«Առավոտ» օրաթերթ,
20.03.2019
