Այսօր Aravot.am-ը Գյումրու քաղաքապետ Սամվել Բալասանյանին հարցրեց՝ ի վերջո ստացա՞ք պատասխան Ռուսաստան Դաշնությունից, որի պաշտպանության նախարար, գեներալ Սերգեյ Շոյգուին դեռ 2015 թվականի մարտ ամսին նամակ-ուղերձ էիք հղել՝ առաջարկելով վերանորոգել իրենց իսկ ռազմաբազայի ծանր տեխնիկայի պատճառով քարուքանդ եղած Գյումրու որոշ փողոցներ։ Խոսքը մոտ 10 կիլոմետր հատվածի մասին է` 102-րդ ռազմաբազայի շուրջբոլորը, Շիրակացու փողոցը շրջանցող ճանապարհը և «Կազաչի պոստի» հատվածը։
«Ո՛չ, պատասխան չեկավ, չի եկել, սպասում եմ, ճիշտն ասած, հույս էլ չունեմ, թեև ուզում եմ հույսս չկտրել, բայց մեկ ամիս առաջ 102-րդ ռազմաբազայում նորից քննարկում եղավ, մենք ասացինք, որ այդ ծրագրի մասին անպայման նորից հիշեցնեն։ Ճիշտն ասած, պաշտպանության նախարարությունն ասում է՝ քաղաքացիական խնդիր է, պետք է ասենք պետությունը ոնց որ անի․ պաշտպանության նախարարությունը նման գործառույթ չունի, դե այնտեղ կա միջգերատեսչական հանձնաժողով։ Այդ հանձնաժողովին մենք նորից ասացինք, որ իրենք անպայման այս հարցը բարձրացնեն, եթե բարձրացրեցին, համաձայնեցին․․․
Նույնիսկ նախագիծը կար, հաշվարկ էր կատարվել, հիմա չեմ կարող ասել հստակ, թե ի՞նչ է լինելու, համենայնդեպս որպես քաղաքապետ՝ ես չեմ սիրում, որ խոսք են տալիս ու կիսատ է մնում ։ Ես որևէ բան եթե խոստանում եմ, անպայման անում եմ»,- ասաց Սամվել Բալասանյանը։
Նունե ԱՐԵՎՇԱՏՅԱՆ
