Ադրբեջանի կողմից առանց համապատասխան ծանուցման հարձակողական բնույթի լայնածավալ զորավարժությունների իրականացումը ԵԱՀԿ գործիքակազմով նախատեսված միջազգային պարտավորությունների խախտում է: Այս մասին այսօր հայտարարեց ՀՀ Արտաքին գործերի նախարարության մամուլի խոսնակ Աննա Նաղդալյանը՝ անդրադառնալով մարտի կեսերին Ադրբեջանում կազմակերպված զորավարժություններին:
«Դա չի նպաստում տարածաշրջանում վստահության մթնոլորտի ամրապնդմանը»,-շեշտեց Աննա Նաղդալյանը: Նրա խոսքով՝ ՀՀ-ն ադրբեջանական զորավարժությունների հարցը բարձրացրել է ԵԱՀԿ-ում եւ Ադրբեջանից համապատասխան բացատրություն պահանջել:
Ինչ վերաբերում է հայ-ադրբեջանական սահմանին մոտ ադրբեջանական նոր զորամասի տեղակայմանը, Աննա Նաղդալյանը նշեց, որ նման քայլը եւս չի նպաստում տարածաշրջանում վստահության մթնոլորտի ամրապնդմանը:
«Մենք ունենք պաշտպանվելու եւ հակահարված հասցնելու հնարավորություն, թող որեւէ մեկն այս հարցում կասկած չունենա: Այդ վճռականությամբ է պայմանավորված մեր հանձնառությունը՝ խաղաղության հաստատման ուղղությամբ»,-եզրափակեց Աննա Նաղդալյանը:
Լուիզա ՍՈՒՔԻԱՍՅԱՆ
