Հայաստանի մարզերում եւ համայնքներում ներդրումային ծրագրեր իրականացնելու նպատակով տարածքային կառավարման եւ զարգացման նախարարության նախաձեռնությամբ մարզպետարանների անմիջական մասնակցությամբ ամեն մարզում նախատեսված է կազմակերպել բիզնես-ֆորումներ: Այս մասին այսօր լրագրողների հետ հանդիպման ժամանակ ասաց տարածքային կառավարման եւ զարգացման նախարար Սուրեն Պապիկյանը: Առաջին բիզնես-ֆորումն, ըստ նախարարի, Լոռու մարզում էր. «Այստեղ ունեցանք բավականին հետաքրքիր բիզնես-ֆորում, որին մասնակցում էին աշխարհի տարբեր հատվածներից եկած հայազգի եւ այլազգի գործարարներ, որոնք նպատակ ունեին Լոռիում ներդրումներ իրականացնել: Ներկայացվել են 50-ից ավելի ներդրումային նախագծեր՝ մարզի տարբեր ոլորտներին առնչվող: Այս փուլում դրանք պարբերաբար ներկայացվում են տարբեր հարթակներում: Նաեւ մեր բանկերից մեկը պատրաստակամություն է հայտնել ուսումնասիրել եւ տնտեսական հաշվարկ անել, դրանց էֆեկտիվությունը վեր հանել: Ներդրումները տաբեր ոլորտներին են վերաբերում՝ զբոսաշրջություն, արդյունաբերություն, գյուղատնտեսություն եւ այլն»:
Պապիկյանը վստահեցրեց՝ հիմա մեծածավալ ներդրումային մի ծրագիր կա, դեռ պարզ չէ, թե մարզում կլինի. «Որովհետեւ այն պահանջում է 30-40 հեկտար տարածք, որը մոտ կլինի մայրուղուն, եւ խնդիր չունենա գազի, լույսի, մեծ քանակությամբ ջրի: Ցավոք, Հայաստանի հանրապետությունը ենթակառուցվածքների խնդիր ունի: Բայց մեր կառավարությունը կարծում է, որ նմանատիպ ծրագրեր ունենալու համար մենք պետք է պատրաստ լինենք ապահովել գործարարին այդ ամենի հասանելիությունը՝ որքան էլ այդ ծախսը մեծ լինի: Որովհետեւ դա ապահովելու է հազարավոր աշխատատեղեր»:
Նախարարի խոսքերով՝ Հայաստանում այս առկա իրավիճակը, ներդրումային ցանկություն ունեցող անձանց քանակը հուշում է՝ 2019 թվականը լինելու է տնտեսական հեղափոխության առանցքային եւ կարեւոր շրջափուլերից մեկը:
Նելլի ԲԱԲԱՅԱՆ
