Մարտի 23-ին առաջին համապետական շաբաթօրյակն է լինելու: Այս մասին այսօր լրագրողների հետ հանդիպման ժամանակ ասաց տարածքային կառավարման եւ զարգացման նախարար Սուրեն Պապիկյանը: Շաբաթօրյակի նպատակն է, ինչպես ասաց նախարարը, մաքրել Հայաստանն աղբից. «Մեկ օրում կամ մեկ շաբաթում դա հնարավոր չէ, եւ այս գործընթացը լինելու է շարունակական: Ամեն ամիս մեկ օր շաբաթօրյակ է լինելու, համապետական մաքրության օր է լինելու: Մեր քաղաքացիներն այդ օրը մաքրելու են բակերն ու այգիները: Խնդիր ունենք նոր որակ հաղորդել գյուղի, բակերի նկատմամբ»:
Պապիկյանի խոսքով՝ մարդիկ բնակարանի նկատմամբ այլ հոգածություն ունեն, բայց դրանից դուրս պատկերն այլ է եւ պետք է հասկանանք, որ Հայաստանում յուրաքանչյուր անկյունը, ծառն ու այգին մերն է, որի նկատմամբ պետք է համապատասխան վերաբերմունք ձեւավորվի. «Սա բխում է նաեւ զբոսաշրջության շահերից եւ մաքրությունը մեր դիմագիծն է: Հայաստանը կազատվի աղբից եւ շատ բան կփոխվի»:
Նախարարի փոխանցմամբ՝ պետական մի շարք կազմակերպությունների իրավասության տակ գտնվող 1700 տեխնիկական միջոցներ կաշխատեն, կփակվեն 6 աղբանոցներ եւ 447 աղբակույտեր:
«339 աղբանոց կա, որոնցից որեւէ մեկը չի համապատասխանում միջազգային ստանդարտներին: Լոկալ աղբավայրերը համայնքի հայեցողությամբ երբեմն ծածկվում են, երբեմն՝ ոչ»,-ասաց Պապիկյանը: Նա նշեց, որ կառավարությունը չի տիրապետում Հայաստանում առկա աղբի կառուցվածքին, ուստի բրիտանական մի ընկերություն ուսումնասիրություն է կատարելու, պարզելու՝ տարեկան Հայաստանում որքան աղբ է կուտակվում. «Սրանից ելնելով՝ այդ ոլորտում ներդրում կատարող ցանկացողներին կարող են տալ հստակ պատկեր»:
Նելլի ԲԱԲԱՅԱՆ
