Լրագրողների հետ հանդիպմանն այսօր ՀՀ վարչապետ Նիկոլ Փաշինյանն անդրադարձավ հարցին, թե ինչու Ստեփանակերտում վերջերս կայացած ՀՀ եւ Արցախի անվտանգության խորհրդի համատեղ նիստին չէր մասնակցում ՀՀ նախագահ Արմեն Սարգսյանը: «Քննարկումների ձեւաչափը որոշվել է նախորդ օրը ուշ երեկոյան, շատ հարցեր կային: Այլ կերպ չէր կարող լինել՝ շատ նրբություններ հաշվի առնելով: Ուշ երեկոյան անձամբ եմ զանգել Արմեն Սարգսյանին, բայց ցավոք, չի հաջողվել կապ հաստատել, որից հետո ԱԱԽ քարտուղարին եմ հանձնարարել Արմեն Սարգսյանի հետ կապվել եւ հրավիրել անվտանգության խորհրդի նիստին»,-պատմեց Փաշինյանը:
Նրա բնորոշմամբ. «Քանի որ առավոտյան ՀՀ Պաշտպանության նախարարն ուղղաթիռով պետք է գար, ԱԱԽ քարտուղարին խնդրել եմ նախագահին փոխանցել, որ ՊՆ-ի հետ ուղղաթիռով գա: Հետո առիթ չեմ ունեցել քննարկել, թե ինչու Արմեն Սարգսյանը չեկավ»:
Հարցին՝ «Արմեն Սարգսյանին ընդունո՞ւմ եք որպես նախորդ իշխանության կադր», Նիկոլ Փաշինյանը պատասխանեց. «Ընդունում եմ որպես ՀՀ նախագահի, որն ունի Սահմանադրությամբ վերապահված լիազորություններ: Մենք փոխադարձ հարգանքով ենք վերաբերվում լիազորություններին: Հստակ արձանագրել ենք, թե ինչպիսինն են իրավիճակը եւ սահմանադրական կարգավորումները»:
Լուիզա ՍՈՒՔԻԱՍՅԱՆ
