Անօրինական դատապարտված ակտիվիստների ազատ արձակումն Ադրբեջանում դրական քայլ է, բայց վախի և բռնաճնշումների մթնոլորտը վերացնելու համար անհրաժեշտ է ավելին: Այս մասին ասվում է Amnesty International միջազգային կազմակերպության հայտարարության մեջ:
Ադրբեջանի նախագահ Իլհամ Ալիևը մարտի 16-ին հրաման է ստորագրել ավելի քան 400 մարդկանց ներում շնորհելու վերաբերյալ. նրանց թվում կան երիտասարդ ակտիվիստներ և ընդդիմադիր քաղաքական գործիչներ, որոնք անարդարացիորեն դատապարտվել են շինծու մեղադրանքներով:
«Amnesty International-ն ուրախ է տեսնել, որ անօրինական դատապարտված ակտիվիստները վերամիավորվել են ընտանիքների հետ, բայց այդ քայլը քիչ է փոխում բռնաճնշումների ընդհանուր պատկերն Ադրբեջանում, չնայած 51 քաղբանտարկյալների ներում շնորհելու հանգամանքին»,- ասվում է հայտարարության մեջ:
Տեղի իրավապաշտպան կազմակերպությունները պնդում են, որ առնվազն 74 անարդարացիորեն կալանավորված ակտիվիստներ, լրագրողներ և քաղաքական գործիչներ շարունակում են մնալ ճաղերի ետևում:
Հայտարարության մեջ նշվում է, որ Ադրբեջանում նախկինի պես շարունակվում է ռեպրեսիվ օրենսդրությունը, որով սահմանափակվում է հասարակական կազմակերպությունների գրանցումն ու ֆինանսավորումը, ինչը գործնականում անհնար է դարձնում քաղաքացիական հասարակության գործունեությունը:
Ադրբեջանը շարունակում է փակ մնալ մարդու իրավունքների մշտադիտարկումների համար, քանի որ մարդու իրավունքների միջազգային դիտորդներին, այդ թվում Amnesty International-ին թույլ չեն տալիս մուտք գործել երկիր:
Ուստի, իրավապաշտպաններն Ադրբեջանին խորհուրդ են տալիս փոխել օրենսդրությունը և թույլ տալ քաղաքացիական հասարակության խմբերին գործել ազատ, այդ թվում գրանցման և ֆինանսավորման սահմանափակումները հանելու ճանապարհով: Ադրբեջանի միջազգային գործընկերները, այդ թվում ԵՄ-ը պետք է շարունակեն ճնշում գործադրել Բաքվի վրա, որպեսզի իշխանություններն անցկացնեն լայնածավալ բարեփոխումներ մարդու իրավունքների ոլորտում՝ վախի և բռնաճնշումների մթնոլորտը երկրում փոխելու համար:
Պատրաստեց՝ Վիկտորյա ԱՆԴՐԵԱՍՅԱՆԸ
