Մարտի մեկի իրադարձությունների տասը զոհերի սպանությունների մեղավորներին բացահայտելու նպատակով նոր քրեական գործ հարուցելու անհրաժեշտություն չկա, «Մարտի մեկի» քրեական գործն արդեն իսկ հարուցված է: Այս մասին այսօր լրագրողների հետ հանդիպմանը հայտարարեց վարչապետ Նիկոլ Փաշինյանը: «Գործ ունենք նրա հետ, որ կրակված փամփուշտների պարկուճները փոխված են եղել: Ինչո՞ւ, որովհետեւ դրանց փորձաքննությունը կարող էր տալ շատ հարցերի պատասխաններ, այդ թվում՝ սպանությունները կատարողներին բացահայտելու առումով»,-նշեց Նիկոլ Փաշինյանը:
Ապա հարցադրում արեց. «Հակառակ դեպքում, ի՞նչ իմաստ ուներ պարկուճները փոխել: Տեսակետը կա, որ այդպես փորձ է արվել նաեւ բանակի ներգրավվածությունը թաքցնել, բայց մեծ հավանականություն ունի նաեւ այն վարկածը, որ դրանց թվում եղել են այն պարկուճները, որոնք կապվել են սպանությունների հետ: Սա նշանակում է, որ քննչական մարմինն իմացել է, թե ովքեր են սպանել: Այդ մարդիկ պետք է գան ու ասեն, թե ինչու են փոխել պարկուճները: Բայց, կարծես թե, ցանկություն չկա, ինչը լավ չէ»:
Նիկոլ Փաշինյանը վստահեցրեց՝ ամեն դեպքում, արվելու է ամեն ինչ՝ մարտի մեկի սպանությունների բացահայտման համար:
https://www.facebook.com/aravot.am/videos/2295864670671840/
Լուիզա ՍՈՒՔԻԱՍՅԱՆ
