Ի՞նչ է անցումային արդարադատությունը: Այս հարցն այսօր ԱԺ Պետաիրավական հարցերի մշտական հանձնաժողովում, կառավարության 2018 թվականի ծրագրի հաշվետվության քննարկման ժամանակ ՀՀ արդարադատության նախարար Արտակ Զեյնալյանին ուղղեց ԲՀԿ խմբակցության պատգամավոր Գեւորգ Պետրոսյանը:
«Կառավարության ծրագրում անցումային արդարադատությունից մեկ բառ անգամ չկա, բայց որտեղ գնում ես, որ լրագրողի հետ խոսում ես՝ անցումային արդարադատության մասին են հարցնում: Նաեւ կան որոշ քաղաքական գործիչներ, որ մեկ դատարան չեն մտել, բայց մշտապես խոսում են դրա մասին: Ի վերջո, սա ի՞նչ է նշանակում, ի՞նչ հասկացություն է, որ դրվել է շրջանառության մեջ, բայց ոչ ոք չի հասկանում: Վերջապես, պետք է կառավարությունը բացատրի՝ ի՞նչ է նշանակում: Եվ եթե օրակարգային հարց է, ինչո՞ւ ծրագրում տեղ չի գտել»,-ասաց պատգամավորը:
«Անցումային արդարադատությունը լինելու է հասարակության հաշտեցումը, իրավունքների վերականգնումը: Այն չի լինելու դատավորների դատարան»,- պարզաբանեց նախարարը`հավելելով, որ չի կարող հակասել Սահմանադրությանը: Հարցը դեռ կառավարությունում ուսումնասիրում են. «Բայց կարող եմ ասել, որ անցումային արդարադատության էլեմենտ կարող է հանդիսանալ վարչական եւ քրեական համաներումը, որը կիրառվել է»:
Գեւորգ Պետրոսյանի արձագանքն այսպիսին էր. «Այդպես էլ չհասկացա, թե ի՞նչ է էությունը, քանի որ այն որեւէ օրենքով, նաեւ Սահմանադրությամբ, սահմանված չէ: Եթե օրենքներով սահմանված չէ ո՞նց ենք հասնելու»:
Արտակ Զեյնալյանը ավելի հստակեցրեց`կառավարության ընթացիկ ծրագրում այդ մասին ոչինչ գրված չէ, ինքն ուղղակի իր կարծիքն է արտահայտում:
Նելլի ԳՐԻԳՈՐՅԱՆ
