Հայաստանում վարչական համաներման արդյունքում համաներվել է 108 916 անձ: Այս մասին այսօր ԱԺ պետաիրավական հարցերի հանձնաժողովում ներկայացվող կառավարության ծրագրի կատարման ընթացքի հաշվետվության շրջանակներում հայտարարեց ՀՀ արդարադատության նախարար Արտակ Զեյնալյանը:
Նախարարն այլ թվեր էլ հրապարակեց. իրականացվել է նաեւ քրեական համաներում, որի արդյունքում 627 անձ է համաներվել, իսկ պրոբացիոն ծառայությունում համաներում է կիրառվել 2342 շահառուի նկատմամբ:
Արտակ Զեյնալյանը տեղեկացրեց, որ Երեւանի չորս բժշկական կենտրոններում, նաեւ Վանաձորի, Գյումրի եւ Գորիսի ԲԿ-ներում, կալանավորների համար ունենալու են հատուկ բաժանմունքներ: Աշխատանքները ընթացքի մեջ են:
Ցմահ ազատազրկվածների դեպքում սկսել է գործել պատժից պայմանական վաղաժամկետ ազատ արձակելու մեխանիզմը: Ցմահ դատապարտված մեկ անձ ազատ է արձակվել: Ոլորտի բարեփոխումների արդյունքում, պատժի կրումից վաղաժամկետ ազատվել է 230-ից ավելի անձ: Նախարարն ասաց նաեւ, որ առանձնապես ծանր հանցանք կատարածների, նաեւ ցմահների համար տեսակցության ժամանակը երկարացվել է:
Նաեւ ՄԻՊ-ի հետ արդյունավետ համագործակցության արդյունքում, կամայական տեսակցությունն արգելելու խնդիրը լուծվել է:
Նախարարն ասաց, որ վերջին տաս տարիների ընթացքում ՔԿՀ-ների պահպանման համար բյուջեից 280 մլն դրամ հատկացրել են մի քանի ՔԿՀ-ների` դատպարտյալների եւ կալանավորների կենցաղային պայմանների բարելավման համար:
Զեկույցի մանրամասները` այստեղ:
Նելլի ԳՐԻԳՈՐՅԱՆ
