Արարատի մարզի Ավշար գյուղի դպրոցում արդեն մեկ շաբաթ է՝ դասադուլ եւ գործադուլ է: Դպրոցի աշխատակազմն ու աշակերտները պահանջում են նոր տնօրենի հրաժարականը, որը դպրոցի փոխտնօրեն Գայանե Մարտիրոսյանին առանց պատճառի աշխատանքից ազատելու պահանջ է ներկայացրել, որպեսզի այդ պաշտոնում նշանակի Արարատի մարզպետ Գարիկ Սարգսյանի մորաքրոջ հարսին:
«Մենք մեկ շաբաթ է՝ դասադուլ ենք անում, ու ոչ մեկ մեզանով չի հետաքրքրվում: Մեր պահանջն է, որ տնօրենը հրաժարական տա: Ես չեմ հասկանում, բոլորը թքած ունե՞ն մեզ վրա, մենք մեկ շաբաթ է՝ դասի չենք գալիս ու դա ոչ մեկին չի հետաքրքրում»,-ասաց դպրոցականներից մեկը:
«Մեր կրթության իրավունքն է ոտնահարվում…Մենք գրել ենք նախարարին, փոխվարչապետին, բայց մեզ որեւէ մեկը չի պատասխանել»,-ասաց մեկ ուրիշը:
12-րդ դասարանցիներն էլ դժգոհեցին, որ ավարտում են, սակայն ոչ մի բանի չեն պատրաստվել: Նրանց մեջ կան օլիմպիադայի հաղթողներ, որոնք Գայանե Մարտիրոսյանի սաներն են:
«Եթե մենք անչափահաս մարդիկ ենք, փողոց ենք փակում, ինչու մեզ հետ չխոսեն, մենք ուզում ենք իր հետ խոսել, ինքը խուսափում է»,-ասաց մի աշակերտ` նկատի ունենալով տնօրենին:
«Եթե ինքը զայրացրել է ամբողջ համայնքին, ինչպե՞ս է պատրաստվում աշխատել այն համայնքի հետ, որն իրեն չի վստահում»,-ասաց նույն դպրոցի մի աշակերտուհի:
Երեխաները շեշտեցին, որ որեւէ մեկը չի հորդորել իրենց դասերը շարունակել, նման հորդոր չի եղել նաեւ ԿԳ նախարարի կողմից: Նաեւ նշեցին, որ որեւէ մեկը իրենց սադրանքների չի մղում, ինչպես փորձում են ներկայացնել:
https://www.facebook.com/Sona80.aghekyan/videos/2359290421024868/
Գոհար ՀԱԿՈԲՅԱՆ
