«Հանրային տարածքները երկու տասնամյակ զավթված են եղել ապօրինի ձեւով: Հիմա դրանք հնարավոր եւ տրամաբանությանը մոտ միջոցներով պետք է վերադարձնել հանրությանը: Իհարկե, բոլորը քանդել պետք չի, բայց որոնք կառուցվել են ապօրինի, պետք է վերացնել»,-Aravot.am-ի հետ զրույցում անդրադառնալով Օպերայի եւ բալետի ազգային ակադեմիական թատրոնի շենքի հարակից սրճարանների քանդմանը, ասաց «Հայկական բնապահպանական ճակատ»-ի անդամ, աշխարհագրագետ Լեւոն Գալստյանը:
Նա նկատեց՝ Երեւանում կան անմխիթար վիճակում գտնվող կանաչ գոտիներ, բայց գործընթացը պետք էր սկսել հենց Ազատության հրապարակից, ինչպես նաեւ՝ Օղակաձեւ այգուց, քանի որ դրանք իրականության՝ ապօրինությունների ցցուն եւ դասական օրինակն են. «Այլապես պարզ է, որ Ազատության հրապարակի սրճարաններն առաջնային չէին»:
Հետաքրքրվեցինք՝ «տարիներ առաջ, երբ Երեւանի նախկին քաղաքապետ Տարոն Մարգարյանի հանձնարարությամբ Աբովյան փողոցի «բուտիկներն» ապամոնտաժվեցին, վերջիններիս սեփականատերերի եւ աշխատակիցների կողմից նման ընդվզում չեղավ. ձեր կարծիքով՝ ինչո՞ւ»: Լեւոն Գալստյանը պատասխանեց. «Այն ժամանակ նրանց տվել էին տարածքներ, որպեսզի գային Մաշտոցի պուրակ, այդ պատճառով մեծ ընդվզում չեղավ: Բայց, ինչպես հիշում ենք, Մաշտոցի պուրակում քաղաքացիական մեծ ընդվզման շնորհիվ այդ ամենը չեղավ: Նրանք նույն՝ իրենց «թայֆա»-ի մարդիկ էին, որոնց որոշել էին ինչ-ինչ պատճառներով հանել Աբովյան փողոցից: Նույն համակարգի մարդիկ իրար մեջ չեն ընդվզում, իրար հետ այդ որոշումը կայացրել էին՝ փոխադարձ համաձայնությամբ»:
Լուիզա ՍՈՒՔԻԱՍՅԱՆ
