Ադրբեջանը 2018թ. պաշտպանության ոլորտի հատկացումներն ավելացրել է 300 միլիոն դոլարով՝ հասցնելով մոտ 1.94 մլրդ դոլարի: Այս մասին հայտարարել է Ադրբեջանի վարչապետ Նովրուզ Մամեդովը:
«2018թ. Ադրբեջանի պաշտպանական ծախսերն ավելացել են 526.8 մլն մանաթով և կազմել 3.3 մլրդ մանաթ»,- ասել է Մամեդովը՝ ելույթ ունենալով խորհրդարանում:
Նրա խոսքով՝ անցյալ տարի Ադրբեջանում շարունակվել են գործողությունները՝ ուղղված ռազմարդյունաբերական ներուժի բարելավմանը, բանակաշինության կատարելագործմանը, ԶՈՒ-ին ամենաժամանակակից սպառազինությամբ և տեխնիկայով ապահովելուն և բանակի մարտական ոգու բարձրացմանը:
«Դրա համար ձեռք են բերվել, այդ թվում բարձր ճշգրտությամբ «Պոլոնեզ» համազարկային կրակի ռեակտիվ համակարգեր և «Լորա» օպերատիվ-մարտավարական հրթիռային համալիրներ, հակաբալիստիկ պաշտպանության միջոցներ, ԱԹՍ-ներ և այլն»,- ասել է նա:
Պատրաստեց՝ Վիկտորյա ԱՆԴՐԵԱՍՅԱՆԸ
