Եթե Հայաստանն ու Ադրբեջանը ինչ-որ պահի համաձայնության գան Լեռնային Ղարաբաղը բանակցային գործընթացում ներգրավելու շուրջ, ապա Մոսկվան կհարգի այդ որոշումը: Այս մասին այսօր տեղի ունեցած ճեպազրույցում հայտարարել է Ռուսաստանի ԱԳՆ պաշտոնական ներկայացուցիչ Մարիա Զախարովան:
«Ռուսաստանի Դաշնությունը՝ որպես ԵԱՀԿ Մինսկի խմբի համանախագահ- երկիր, բազմիցս արտահայտվել է բանակցային գործընթացի ձևաչափի վերաբերյալ, որի փոփոխությունը հնարավոր է կողմերի համաձայնության դեպքում,- ասել է Զախարովան:- Եթե նրանք որոշակի փուլում համաձայնության գան, որ Լեռնային Ղարաբաղը կրկին ներկայացված լինի բանակցություններում, ապա դա կլինի հենց կողմերի որոշումը, և մենք դա կհարգենք»:
Ընդ որում, Զախարովան հավելել է, որ դա ոչ միայն Մոսկվայի, այլև Մինսկի խմբի մյուս համանախագահ-երկրների դիրքորոշումն է: «Կխնդրեի ուշադրություն դարձնել համանախագահների մարտի 9-ի հայտարարության վրա, որտեղ բավականին հստակ արտացոլված են Ռուսաստանի, ԱՄՆ-ի և Ֆրանսիայի մոտեցումներն այդ հարցի վերաբերյալ»,- ասել է նա:
Հարցին՝ արդյոք Ռուսաստանը պատրաստ է հարթակ տրամադրել ապրիլի 5-ին Մոսկվայում ԱՊՀ երկրների նախարարների խորհրդի շրջանակում Հայաստանի և Ադրբեջանի ԱԳՆ ղեկավարների հանդիպման համար, Զախարովան խորհուրդ է տվել ժամանակից առաջ չանցնել՝ հաշվի առնելով խնդրի «նրբությունն ու սրությունը, այդ թվում, երբեմն որոշ ԶԼՄ-ների կողմից այդ հարցի ոչ ճշգրիտ լուսաբանումը»:
«Երբ կողմերը այլ հարցերով, բոլոր հարցերով դիմում են ռուսական կողմին նման հնարավորության համար, այսինքն՝ հարթակ տրամադրելու կամ միջնորդական դեր ստանձնելու հարցով, Մոսկվան միշտ հարգանքով դիտարկում է այդ խնդրանքը»,- ասել է Զախարովան:
Պատրաստեց՝ Վիկտորյա ԱՆԴՐԵԱՍՅԱՆԸ
