ՀՀ Առողջապահության նախարարության տեսչական մարմինը Կոտայքի մարզի 32 ԱԳԼՃԿ-ներում վերջին ուսումնասիրությունների արդյունքում խախտումներ է հայտնաբերել: Այս մասին այսօր լրագրողներին հայտնեց Կոտայքի մարզպետ Ռոմանոս Պետրոսյանը:
«Բոլոր ԱԳԼՃԿ-ների դեպքում վարույթներ են հարուցվել՝ մեծ մասին տուգանելու, մի մասին՝ նախազգուշացնելու տեսքով: ԱԳԼՃԿ-ներն իրենց նախագծով ամրագրված եւ միջազգային նորմերին համապատասխանող սանհանգույցներ պետք է ունենան»,-տեղեկացրեց մարզպետը:
Նրա խոսքով՝ առաջիկայում ԱԳԼՃԿ-ների սանհանգույցները կկահավորվեն վահանակներով եւ լույսերով. «Որպես ենթակառուցվածքներ՝ դրանք անվճար կծառայեն հանրային սանհանգույցներ: Այս պահին մոտ տասը ԱԳԼՃԿ-ում շինարարություն է՝ նորացնում են սանհանգույցները»:
Ռոմանոս Պետրոսյանը հավելեց, որ մինչեւ մայիս-հունիս նախատեսում են աշխատանքներն ավարտել:
Լուիզա ՍՈՒՔԻԱՍՅԱՆ
