Ադրբեջանի արտգործնախարար Էլմար Մամեդյարովը կարծում է, որ Հայաստանի վարչապետ Նիկոլ Փաշինյանը Ադրբեջանի նախագահի հետ հանդիպմանը կարող է բարձրացնել ցանկացած հարց: Այս մասին նա ասել է Interfax-ի ադրբեջանական ծառայության հետ զրույցում:
«Ես չգիտեմ՝ ինչը կլինի առաջնահերթություն (Փաշինյանի համար երկու առաջնորդների հանդիպման ժամանակ-խմբ.):Նա, թերևս, կարող է բարձրացնել ցանկացած հարց: Ամեն դեպքում, բանակցությունների ձևաչափի մասով հստակ արտահայտվել են և՛ Եվրամիությունում, և՛ Ադրբեջանի նախագահը: Այդ հարցի վերաբերյալ հայտարարությամբ են հանդես եկել նաև ԵԱՀԿ Մինսկի խմբի համանախագահները»,- ասել է Մամեդյարովը գործակալության հետ զրույցում:
Նա նաև կարծիք է հայտնել, որ Փաշինյանին չի հաջողվի տնտեսական հեղափոխություն իրականացնել «առանց Թուրքիայի և Ադրբեջանի հետ հարաբերությունների կարգավորման»:
Մամեդյարովն անդրադարձել է նաև Փաշինյանի այն հայտարարությանը, թե անհրաժեշտ է Հայաստանի և Ադրբեջանի ժողովուրդներին պատրաստել խաղաղության: «Ադրբեջանի ժողովուրդը ես եմ ձեզ հետ. ես առայժմ չեմ զգում, դուք՝ չգիտեմ: Գոյություն ունեն Լեռնային Ղարաբաղի հայ և ադրբեջանական համայնքներ: Տվյալ դեպքում մենք պետք է տեսնենք՝ արդյոք առաջ ենք շարժվում, թե զբաղվում ենք դատարկախոսությամբ: Բոլորը ամեն ինչ գիտեն, մնում է քաղաքական կամքը: Պատահական չէ, որ Փարոզում հայտարարություն արվեց Հայաստանի և Ադրբեջանի բնակչությանը խաղաղության պատրաստելու վերաբերյալ»,- ասել է Մամեդյարովը:
Պատրաստեց՝ Վիկտորյա ԱՆԴՐԵԱՍՅԱՆԸ
