Հայաստանում Ֆրանսիայի դեսպան Ժոնաթան Լաքոտը մարտի 13-ին կայացած ասուլիսում ազդարարեց «Ֆրանսիայի համը» միջոցառման մեկնարկի մասին, որը նշվում է ողջ աշխարհում:
«Դա ֆրանսիական գաստրոնոմիայի տոնակատարությունն է ողջ աշխարհում: Ահա 5-րդ տարին անընդմեջ աշխարհի 150 երկրների 5000 խոհարարներ համախմբվելու են այս տոնակատարությունը նշելու համար…Գաստրոնոմիան ֆրանսիական ինքնության անքակտելի մաս է կազմում, այն մեր մշակույթի արժեհամակարգի եւ քաղաքակրթության մասն է, օժտված է տնտեսական նշանակությամբ բայց ունի նաեւ սոցիալական նշանակություն: Ֆրանսիական գաստրոնոմիան գրանցված է ՅՈՒՆԵՍԿՕ-ի ոչ նյութական մշակութային ժառանգության ցանկում»,- ասաց դեսպանը:
Մանրամասն՝ տեսանյութում:
Նա տեղեկացրեց, որ հայաստանյան 24 ռեստորան եւ 3 միջին մասնագիտական հաստատություն` Երեւանում, Գյումրիում եւ Դիլիջանում միացել են Gout de France միջոցառմանը:
Ժոնաթան Լաքոտի ձեւակերպմամբ, Հայաստանն ու Ֆրանսիան քաջ գիտակցում են, որ ընթրիքը կամ ընդհանրապես կերակուրի շուրջ հավաքվելը ավելին է, քան սնունդը վայելելը: Դեսպանի խոսքերով, դա նաեւ սոցիալական եւ ընտանեկան խորը ուղղվածություն ունի:
Մանրամասն՝ տեսանյութում:
Ժոնաթան Լաքոտի խոսքերով, հայաստանյան ռեստորանների հետաքրքրությունը ֆրանսիական խոհանոցի հանդեպ փաստում է. «Հեղափոխությունը տեղ է գտել նաեւ հայկական ափսեներում»:
Դեսպանը հայտնեց, որ Gout de France-ը նախատեսում է տոնական գալա ընթրիք, որն այս տարի կազմակերպվելու է Գյումրիի Տիրամայր Հայաստան կուսաստան եւ կրթական կենտրոնում: Հաստատությանը կից ուսումնական կենտրոնի սաները կօգնեն դեսպանատան ավագ խոհարարին պատրաստել ընթրիքը` ստեղծելով փորձի փոխանակման միջավայր:
Մի ընթրիք էլ մարտի 20-ին կկազմակերպվի Ֆրանս-հայկական մասնագիտական ուսումնական կենտրոնում: Վերջինիս ներկայացուցիչը նշեց, որ արդեն քանի տարի մասնակցում են տոնակատարությանը, իսկ անցյալ տարին իրենց համար եղել է Ֆրանսիայի համի տարի` պայմանավորված ֆրանկոֆոնիական գագաթնաժողովով:
Գոհար ՀԱԿՈԲՅԱՆ
