ՀՀԿ փոխնախագահ Արմեն Աշոտյանը ֆեյսբուքյան ուղիղ եթերով անդրադարձել է Ստեփանակերտում տեղի ունեցած երկու անվտանգության խորհուրդների համատեղ նիստին. «Մենք լսեցինք ՀՀ գործող վարչապետի՝ Նիկոլ Փաշինյանի՝ Արցախի հարցի հետ կապված երեւի այս ընթացքում ամենահամապարփակ ելույթը: Արդյոք այդ ելույթը կատարյա՞լ էր՝ իհարկե, ոչ, արդյոք բոլո՞ր թեմաներն էին արծարծված, իհարկե, ոչ: Խոստովանենք, որ Նիկոլ Փաշինյանի վարչապետության 10 ամիսների ընթացքում նա դեռեւս նման ծրագրային ելույթ չէր ունեցել արցախյան հակամարտության կարգավորման հետ կապված»:
Աշոտյանն, անդրադառնալով ելույթի կառուցվածքին՝ ասաց, որ Փաշինյանի ելույթի առաջին կետը Արցախի մասնակցության հարցն էր՝ բանակցություններին, որի մասին նա խոսել էր դեռեւս անցյալ տարի մայիսի 9-ին Ստեփանակերտում. «Ակնհայտ է, որ անցյալ տարի հայտարարված այս մոտեցումը մի կողմից նոր չէ՝ որպես մոտեցում, մյուս կողմից Հայաստանում տեղի ունեցած իշխանափոխությունը արցախյան հարցում կապիտալիզացնելու հիմնավորված փորձ էր, սակայն, որպես ճիշտ ռազմավարական նպատակ, այն չուղեկցվեց մարտավարական ճիշտ աշխատանքով»:
Ըստ Աշոտյանի, Փաշինյանը գերագնահատեց իր եւ իշխանափոխության աշխարհաքաղաքական կարեւորությունը, քաշը, չաշխատեց Մինսկի խմբի համանախագահների հետ նախապես ու արդյունքում մենք ականատես ենք լինում համանախագահների կողմից նման հայտարարության:
Մանրամասները՝ տեսանյութում
https://www.facebook.com/armen.ashotyan/videos/10217769999139836/
Հռիփսիմե ՋԵԲԵՋՅԱՆ
