Ինչպես ավելի վաղ հայտնել էինք, ՀՀԿ-ական նախկին պատգամավոր Արամ Հարությունյանը, որը հետախուզման մեջ է, առաջին ատյանի դատարանին բողոք է ներկայացրել իր հանդեպ քրեական գործի վերաբացման դեմ: Հիշեցնենք, որ Արամ Հարությունյանը, որը 2007թ.-ից եղել է բնապահպանության նախարար, մեղադրվում է հանքերի շահագործման լիցենզիայի տրամադրման դիմաց գործարար Սիլվա Համբարձումյանից առանձնապես խոշոր չափի` 14 միլիոն դոլար կաշառք ստանալու և փողերի լվացման համար։ Այս գործի վարույթը տարիներ առաջ կասեցվել էր եւ վերաբացվել 2018թ.-ին՝ նոր երեւան եկած հանգամանքի հիմքով: Այսօր բողոքի քննության հերթական նիստում Սիլվա Համբարձումյանն էլ դիրքորոշում հայտնեց, քանի որ այս գործով շահագրգիռ անձ է:
Նա ասաց, որ Արամ Հարությունյանի բողոքի դեմ առարկում է, քանի որ գտնում է, որ գործը վերաբացելու մասին դատախազի որոշումն օրինական է: Արաքս Դիլանյանին(Արամ Հարությունյանի գործով մեկ այլ մեղադրյալ) առնչվող դրվագների հետ կապված էլ Սիլվա Համբարձումյանը նշեց. «Նա ստել է, թե ինձանից գումար չի ստացել: Ունեմ Դուբայից ուղարկված փաստաթղթեր այն մասին, որ ութ միլիոն դոլար գումարը նստել է նրա հաշվին, նա էլ բաշխել է երեք անձերի միջեւ»: Հիշեցնենք՝ 2018թ.-ին Սիլվա Համբարձումյանը հայտարարել էր՝ Արաքս Դիլանյանն Արամ Հարությունյանի մտերիմն է, որի Դուբայի հաշվին ինքը փոխանցել է 8 միլիոն դոլար: Արաքս Դիլանյանն էլ հայտարարել է, որ չի ճանաչում Սիլվա Համբարձումյանին:
Այսօրվա նիստում գործով քննիչ Դավիթ Կոստանդյանը միջնորդեց, որպեսզի բողոքի քննությունն անցկացվի դռնփակ, քանի որ Արամ Հարությունյանի գործով դեռեւս նախաքննություն է ընթանում: «Ցանկալի չէ նախաքննական գաղտնիք պարունակող տեղեկությունների հրապարակումը»,-իր հերթին պնդեց մեղադրող-դատախազ Հայկ Պետրոսյանը: Արամ Հարությունյանի շահերի պաշտպան, փաստաբան Կարեն Հակոբյանն առարկեց: «Երբ վարույթն իրականացնող մարմնին պետք է, գաղտնիք չկա, ամեն ինչ կարելի է հրապարակել»,-հեգնեց նա, ապա հավելեց,-«վարչապետի մակարդակով ԱԺ-ին սպառնալիքներ են ուղղվել Արամ Հարությունյանի առնչությամբ: Մեր բողոքի հրապարակայնությունը պետք է ապահովվի: Թող հանրությունը երկու կողմին լսի եւ հասկանա, թե ով է ճիշտ»: Դատարանը բողոքի քննությունը դռնփակ անցկացնելու շուրջ կողմերի կարծիքները կշարունակի լսել ապրիլի 26-ին՝ 14:00-ին:
Լրագրողների հետ զրույցում Սիլվա Համբարձումյանն անդրադառնալով Արամ Հարությունյանի գործին՝ ասաց. «Արդարությունը պետք է հաղթի, եւ Արամ Հարությունյանը պետք է կալանավորվի, Արաքս Դիլանյանն էլ ասի, որ ստացել է այդ գումարը: Գումարը կազմել է 14 միլիոն դոլար։ Ութ միլիոնը հստակեցված է, քանի որ փոխանցում է եղել, իսկ մնացածը Սուրեն Ավագյանի միջոցով է եղել՝ կանխիկ։ Ավագյանն Արամ Հարությունյանի համակուրսեցին է, նրա նազիր-վեզիրը»:
Լուիզա ՍՈՒՔԻԱՍՅԱՆ
