Ի՞նչ կետում է տնտեսական հեղափոխությունը. զրուցում ենք տնտեսագետ ՄՈՎՍԵՍ ԱՐԻՍՏԱԿԵՍՅԱՆԻ հետ։
-Այսօր օպտիմալացման քաոս է ստեղծվել իշխանությունում, նախ` 10 հազար պետծառայողի համարում են «հավելյալ արդյունք չստեղծող», որոնք պետք է ազատվեն աշխատանքից, սակայն անհասկանալի է` այդ մարդկանց հետ կրճատվու՞մ են նրանց վերապահված գործառույթները, թե՞ ոչ։ Անհասկանալի կարգավիճակ են ստանում որոշ նախարարություններ։ Ի վերջո, այս օպտիմալացումից բյուջեն որքա՞ն կշահի։
-Օպտիմալացումը լավ քայլ է, քանի որ նախկին իշխանությունը պետական ապարատում տեղավորում էր բացառապես ՀՀԿ-ականներին։ Երկար ժամանակ եղել եմ քաղծառայության հանձնաժողովի կազմում, գիտեմ, թե ինչպես են այդ մրցույթներն անցկացվում։ Թույլ էին տալիս երկու հոգի անցնի, մեկը` լավ մասնագետ, մյուսը՝ ՀՀԿ-ական։ Նախարարն ինքնակամ որոշում էր աշխատանքի ընդունել ՀՀԿ-ականին կամ կոալիցիոն գործընկերոջ առաջարկած թեկնածուին։ Նախկին իշխանության անդամներից մեկը` նախկին նախարար Վարդան Վարդանյանը (այսօր ԲՀԿ խմբակցության պատգամավոր է-Ռ.Խ.), ինձ ասաց, թե ինչու իմ որդուն, որ երեք անգամ հաղթել էր քաղծառայության մրցույթում, չի ընդունում աշխատանքի, որովհետև ընդդիմության ներկայացուցիչ է։ Դրա համար էլ թողեց երկրից գնաց։ Ցավալիորեն հիմա էլ նույն քաղաքականությունն է շարունակվում։ Ահա այսպես էլ համակարգն ուռճացվել է։
Կարծում եմ, մարզպետարաններն ավելորդ օղակներ են, պահպանելու դեպքում էլ 50 տոկոսով պետք է կրճատվեն, դրանք խլում են ՏԻՄ-երի գործառույթները։ Սա աբսուրդ է։ Դրա համար էլ ՏԻՄ-երի ինստիտուտը չի զարգանում։ Արտակարգ իրավիճակների նախարարություն էլ չպետք է լիներ, այն կարող էր միանալ ոստիկանությանը։ Գուցե այս ամենից բյուջեն չշահի, բայց պետական ծառայողի աշխատանքն ավելի գրավիչ կդառնա։ Կցանկանայի մի բանի վրա էլ ուշադրություն սևեռել, որն անտեսվում է։ Կենտրոնական բանկում աշխատում է 850 մարդ, համարյա 4 նախարարություն, արդյունավետության առումով էլ կարելի է վիճել, միջին աշխատավարձը 625 հազար դրամ է, առնվազն 50 տոկոսով պետք է ԿԲ-ում կրճատումներ լինեն։
Ռուզան ԽԱՉԱՏՐՅԱՆ
Հարցազրույցն ամբողջությամբ՝ «Իրատես» թերթի այսօրվա համարում
