Այսօր ԱԺ ճեպազրույցների ժամանակ «Լուսավոր Հայաստան» խմբակցության ղեկավար Էդմոն Մարուքյանին Aravot.am-ը հարցրեց կառավարության կառուցվածքի փոփոխության մասին: Հաշվարկներ կան, ըստ որոնց շուրջ 310 աշխատակից է կրճատվելու, խնայվելու է տարեկան 1 մլրդ դրամ, ինչը լուրջ էֆեկտ չի կարող թողնել: Օրինակ, Արծվիկ Մինասյանը հաշվարկել է, որ դա ընդամենը 180 դրամով կբարձրացնի թոշակը, ըստ նրա, այս մոտեցումն անփույթ է ու ձախողման է բերելու: Ուստի մենք հետաքրքրվեցինք՝ այս մոտեցումը կիսո՞ւմ եք ու ի՞նչ տեսակետ ունեք:
Մարուքյանը պատասխանեց. «Կառավարությունը մոնոպոլ իրավունք ունի իր կառուցվածքը ներկայացնելու, մենք չէինք կարող մեր տարբերակը ներկայացնել, բայց մենք հիմա այլընտրանքային առաջարկություն ենք պատրաստում, որը միտված է լինելու մի քանի նախարարություններ պահպանելուն, նաեւ այն համակարգը, որի դեմ մենք բոլորս պայքարել ենք, այդ համակարգը վերափոխելուն: Սա նշանակում է, որ ԱԱԾ-ն, ոստիկանությունը ՊԵԿ-ը պետք է վերադառնան կառավարության կառուցվածք՝ նախարարությունների տեսքով: Մենք նախատեսում ենք գյուղնախարարության միացումը էկոնոմիկայի նախարարության հետ, հիմա քննարկումների մեջ ենք մասնագետների հետ: Շատերը պնդում են, որ չի կարելի նման բան անել, այսինքն, գյուղատնտեսության նախարարությունը պետք է լինի: Նմանատիպ քննարկումներ ունենք նաեւ էներգետիկայի եւ մշակույթի նախարարության բարեփոխումների հետ կապված: Հստակ է, որ մենք այլընտրանքային առաջարկությամբ հանդես կգանք թե՛ ոստիկանության, մասով, թե ԱԱԾ-ի ու ՊԵԿ-ի»:
Ինչ վերաբերում է նախարարությունները կրճատելուն՝ Մարուքյանն ասաց. «Տնտեսությունը չի կարող զարգանալ կրճատումներով, սա միանշանակ է: Պետք չի գիտնականների հանդիպել, խոսել, տեսնել՝ տնտեսությունը կզարգանա՞, որ կրճատումներ անենք, թե՞ ոչ: Որտեղ եղել են ուռճացված ապարատներ, պետք է լինեն կրճատումներ, օրինակ, մարզպետարաններին հետ գանք: Փոխմարզպետներ կան, որոնք պետք է կրճատվեն: Կան նաեւ երկար տարիներ մասնագիտացած համակարգեր, որոնք կրճատելու պարագայում խնդիրը չենք կարողանալու լուծել՝ գործառույթները այլ մարմինների վրա դնելով: Գործընթացի կեսից պարզվելու է, որ դա սխալ էր եւ հետ վերադառնալը լինելու է հարված, դու էլ էդ մասնագետներին չես կարողանալու հավաքել, կեսը արտագաղթած կլինեն, միգուցե այլ ոլորտներում աշխատանք գտած: Պետք է նայենք, թե տվյալ ոլորտի համակարգման գործառույթներն ուր են փոխանցվում: Կարծում եմ, լուրջ խնդիրներ են լինելու: Կառավարությունը մեզ թիվ չի ասում, թե կրճատումները ինչ թվաքանակ են լինելու: Նամակներ ենք տեսնում, գրություններ հրապարակված, որ հավելյալ արժեք չստեղծող մարդկանց պետք է կրճատել, ո՞նց են չափել, որ հավելյալ արժեք չստեղծող մարդիկ հենց էդ մարդիկ են, կամ ի՞նչ ենք նկատի ունենում՝ հավելյալ արժեք ասելով: Մենք բուռն քննարկումներ ենք ունենալու կառուցվածքի հետ կապված»:
Հռիփսիմե ՋԵԲԵՋՅԱՆ
