Փետրվարի 1-ից Հայաստանում մեկնարկել է գլխուղեղի անոթների իշեմիկ ինսուլտի բուժման ծրագիր եւ պետպատվերը կգործի ընդամենը երկու հիվանդանոցում: Որոշ հիվանդանոցների գլխավոր բժիշկներ ԱԺ մադու իրավունքների եւ հանրային հարցերի հանձնաժողովի նախագահ Նաիրա Զոհրաբյանին խնդրել են առողջապահության նախարար Արսեն Թորոսյանից հետաքրքրվել`ինչո՞ւ միայն երկու հիվանդանոցում, երբ, իրենց կարծիքով, այլ հիվանդանոցներ ևս պատրաստ են այդ ծառայությունները մատուցել: Նրանք գտնում են, որ սա ուղիղ կոռուպցիայի դրսեւորման աղբյուր է:
Նախարարը պնդում է, որ այդ ծրագիրն ի սկզբանե Հայաստանում իրագործելու հնարավորություն են ունեցել «Էրեբունի» ԲԿ-ն, «Հերացին»: Շուտով նաեւ «Աստղիկ» ԲԿ-ն կմիանա ծրագրին: Նա մանրամասնում է`միայն տրոմբոլիզի ծառայությամբ չէ, որը նաեւ շտապ օգնության մեքենաները կարող են անել, այլ նաեւ տրոմբէկտոմիա եւ տրոմբասպիրացիա պետք է կարողանան ապահովել տվյալ ծրագիրը սպասարկող բուժհաստատությունները:
Նաիրա Զոհրաբյանը հետաքրքրվեց նաեւ ռեանոմոբիլների վճարի 150 հազար դրամ սահմանված արժեքով` նկատելով, որ ոչ բոլոր քաղաքացիները, մանավանդ հեռավոր մարզերում բնակվող, ի վիճակի են վճարել նման գումար:
Նախարարը համաձայն է`արժեքը բարձր է, բայց պետությունն առայժմ սահմանափակ թվով շահառուների կարող է անվճար սպասարկել. միայն շտապ հղիները, մանկական դեպքերն է պետությունը վճարում:
Նելլի ԳՐԻԳՈՐՅԱՆ
