«Բոլոր պարագաներում պարկեշտ անձնավորություն: Անկախ նրանից, ինչ դիրք է գրավել, ինչ պաշտոններ է զբաղեցրել, կտրուկ որակական փոփոխություններ նկատելի չեն եղել՝ սկսած ռազմի դաշտից մինչեւ բարձր պաշտոններ զբաղեցնելը: Եվ այդ ամենի հետ միասին պետական շահի բարձր գիտակցություն»,- Aravot.am-ի հետ զրույցում իր զինակից ընկերոջը՝ Սմբատ Այվազյանին այսպես է բնութագրում նախկին ոստիկանապետ, Երեւանի նախկին քաղաքապետ Սուրեն Աբրահամյանը: Այսօր Եռաբլուր պանթեոնում, որտեղ հուղարկավորված է Արցախյան պատերազմի հերոսը, ընտանիքը, ընկերները նշեցին Սմբատ Այվազյանի ծննդյան 60-ամյակը:
Սուրեն Աբրահամյանի խոսքով, այդպիսի ճանապարհ անցած մարդու համար նույնիսկ զարմանալի է եղել, որ կարողացել է պետական շահի կարեւորությունն այդպես գնահատել. «Այդքանով հանդերձ շատ համեստ անձնավորություն: Այսօր երեւի միակ անհամեստ օրն է, իր կյանքում, որ այսքան մարդ է հրավիրել»:
Մանրամասները՝ տեսանյութում
Aravot.am-ի հարցին, թե նոր սերունդ ինչպիսի վերաբերմունք ունի հերոսներին, նրանց կատարած սխրանքներին, Սուրեն Աբրահամյանն ի պատասխան ասաց, որ սերունդը կփոխվի, բայց, երբեք չի կարելի սերունդների միջեւ այս հարցով հակասություն տեսնել. «Մի պահ, ոնց որ թե լինում էր, բայց հետո խելքի եկան, որ այդպես չի կարելի»:
«Հանրապետություն» կուսակցության նախագահ Արամ Սարգսյանն ափսոսում է, որ Սմբատ Այվազյանը շուտ լքեց իր ընկերներին, հարազատներին: Ասաց, որ ինչպես Վազգեն Սարգսյանի, պատերազմ անցած ազատամարտիկների, Սմբատ Այվազյանի հիմնական նպատակն էլ եղել է անկախ հանրապետության ձեւավորումը. «Թե՛ քաղաքական, թե՛ տնտեսական, թե՛ ռազմական անկախությունը: Ռազմական անկախության համար տղաները իրենց ուժերի չափով պայքարեցին եւ, բարեբախտաբար, այսօր մեր զինված ուժերն այնպիսի դիրքեր ունեն, որ այդ դիրքային առավելություններով Ադրբեջանը չի կարողանում իր ուզածին հասնել»:
Զինակից ընկերների խոսքով, Սմբատ Այվազյանը մասնակցել է Հայաստանի սահմանամերձ շրջանների ու Արցախի պաշտպանության մարտերին: Արցախյան պատերազմի մասնակից Գուրգեն Մելքոնյանի խոսքով, Սմբատը Տիգրան Մեծ ջոկատի անդամ է եղել: Կռվել է Շահումյանում, Կարմիրի պաշտպանության հարցը նույնպես Սմբատ Այվազյանի վրա է դրված եղել. «Լաչինի միջանցքի լայնացման համար Սմբատ Այվազյանը ահռելի գործ է կատարել»:
Սմբատ Այվազյանը մասնագիտությամբ տնտեսագետ էր: 1991 թվականին եղել է Արցախի Շահումյանի շրջանի դատախազը, 1998 երկրապահ պատգամավորական խմբի նախագահ: Նույն թվականին նշանակվել է Հայաստանի Հարկային տեսչության պետ: 1999-2000 թվականներին զբաղեցրել է Պետական եկամուտների նախագահի պաշտոնը:
Եղել է «Հանրապետություն» կուսակցության հիմնադիրներից, ապա քաղաքական խորհրդի անդամ է ընտրվել:
2008-2009 թվականներին քաղաքական հայացքների համար դատապարտվել է: Մահացել է 2014 թվականին:
Լուսինե ԲՈՒԴԱՂՅԱՆ
