«Աշխարհում կառավարության ծրագրի ընդունված որեւէ ձեւաչափ գոյություն չունի: Կարեւոր է միայն այն, թե ինչ սպասումների են հանգեցնելու կառավարության ներկայացվելիք ուղենիշները: Այն պետք է ունենա ազդակ՝ ի՞նչ ակնկալի քաղաքացին կամ տնտեսվարողը երկու կամ հինգ տարում»,-լրագրողների հետ ճեպազրույցում այսօր անդրադառնալով կառավարության գործունեության 5-ամյա ծրագրին` ասաց ՀՀ ֆինանսների նախկին նախարար Վարդան Արամյանը:
Նա մատնանշեց՝ կառավարության ծրագրում նախատեսվում է տարեկան 5% տնտեսական աճ. «Կարծիքներ հնչեցին, թե դա շատ է, կամ քիչ, բայց դա կախված է նրանից, թե ինչի հետ ենք ասոցացնում 5%-ը: Տեսակետներ հնչեցին, որ խոսքը տնտեսական հեղափոխության սպասվելիք ցուցանիշի մասին է, ոմանք էլ ասացին, թե հեղափոխության շրջանակներում ցածր ցուցանիշ է դրված: Որպես մասնագետ ասեմ, որ միջազգային ֆինանսական կառույցների կողմից մեր տնտեսական ներուժը գնահատվում է 4-4,5%: Դա նշանակում է, որ ներուժից ավելի՝ 5% տնտեսական աճ ունենալու համար պետք է իրականացնես բարեփոխումներ: 6% աճ ակնկալելու դեպքում ավելի արագ բարեփոխումների մասին է խոսքը»:
Վարդան Արամյանը հավելեց՝ վտանգ է տեսնում այն փաստում, որ ըստ կառավարության ծրագրի՝ թոշակների չափը պետք է ճշգրտվի ըստ միջին գնաճի. «Գուցե նշյալը հանրության ականջին հաճո է, միաժամանակ՝ շատ լավ է, որ տատիկ-պապիկներն արժանապատիվ թոշակ ստանան, բայց հարց է առաջանում, թե ինչպես է թոշակների բարձրացումն արվելու՝ ինչի՞ հաշվին»:
https://www.facebook.com/aravot.am/videos/334420123855767/
Լուիզա ՍՈՒՔԻԱՍՅԱՆ
