Երկու հանրահայտ իտալացիներ` սաքսոֆոնահար Ֆեդերիկո Մոնդելչին եւ ակորդեոնահար Սիմոնե Զանկինին տպավորված են հայկական երաժշտությամբ: Երեւանյան համերգներին, ի թիվս այլ գործերի, նրանք կատարելու են Բաբաջանյանի եւ Թարիվերդեւի ստեղծագործությունները: Մոնդելչին հիշում է Ալքեսանդր Հարությունյանին, ասում է, որ իր նախկին համերգներից մեկում կոմպոզիտորն առաջին շարքերում էր նստած: Երկու երաժիշտներն էլ նշում են, որ եվրոպական համերգների ժամանակ էլ են իրենց ծրագրերում հայ կոմպոզիտորների գործեր ներառում, ունկնդիրն էլ ջերմությամբ է ընդունում:
Ֆեդերիկո Մոնդելչին «փակագծեր» բացեց, որ Կոմիտասի ստեղծագործությունների փոխադրումներ են արվել, որպեսզի դրանք նվագի սաքսոֆոնով: Նա ընդգծեց, որ հայկական երաժշտությունը ինքնատիպ է, ու եթե անգամ հայազգի կոմպոզիտորը այլ երկրում է ապրում, ինչպես օրինակ, Արամ Խաչատրյանը, միեւնույն է նրա երաժշտությունից հայկականություն է «ծորում»:
Լուսանկարը` Գոհար ՀԱԿՈԲՅԱՆԻ
«Առավոտ» օրաթերթ,
08.03.2019
