«Բելառուսի հետ ունենք բավականին հագեցած օրակարգ, որի անբաժանելի մասն են կազմում երկկողմ փոխայցելությունները». Աննա Նաղդալյան

ՀՀ ԱԳՆ մամուլի խոսնակ Աննա Նաղդալյանի հարցազրույցը 24 News լրատվականին

Հարց. Բելառուսի ԱԳՆ-ն հայտարարություն էր տարածել՝ պահանջելով արագացնել իր թեկնածուին ՀԱՊԿ գլխավոր քարտուղար նշանակելու հարցը: Արդյո՞ք Հայաստանի դիրքորոշման մեջ կա փոփոխություն:

Աննա Նաղդալյան. Շատ հետաքրքիր էր հետևելու ՀԱՊԿ Գլխավոր քարտուղարի պարտականությունների վաղաժամկետ դադարեցման հետ կապված քննարկումներին և տարբեր կանխագուշակումներին, երբ ականատես եղանք, թե մեր հասարակությունում նաև ինչպես գերագնահատվեց կառույցի «գլխավոր մենեջերի» պաշտոնը և ինչպես դա հավասարեցվեց կառույցում Հայաստանի նախագահության հետ: Այժմ կարծես թե թևակոխել ենք առավել կշռադատված և համապարփակ վերլուծությունների դաշտ:

Գլխավոր քարտուղարը կառույցի բնականոն գործունեությունը կարգավորող պաշտոնյան է, ով հետևում է նաև կառույցի անդամ պետությունների ղեկավարների մակարդակով կայացված որոշումների կատարման ընթացքին:

ՀԱՊԿ անդամակցելու ողջ ընթացքում մշտապես ընդգծել ենք կազմակերպության կարևոր դերակատարությունը Հայաստանի անվտանգության համակարգում, ուստի մեր առաջնահերթությունն է քննարկումների և սերտ համագործակցության միջոցով բարձրացնել կառույցի հեղինակությունը և գործունեության արդյունավետությունը: Այդ պրիզմայով էլ պետք է դիտարկել Հայաստանի քայլը՝ ուղղված կառույցի առանձնացմանը երկրի ներիրավական գործընթացներից:

Այս հարցում Հայաստանի դիրքորոշումը հնչել է բազմիցս և ամենատարբեր մակարդակներով. ՀԱՊԿ հիմքում ընկած է անդամ վեց պետությունների համար ընդունելի՝ կոնսենսուսային որոշումների ընդունման համակարգը: Խնդիրը որևէ գործընթաց արագացնելու կամ դանդաղեցնելու մեջ չէ, խնդիրը բոլորի համար ընդունելի որոշումների կայացմամբ կառույցի արդյունավետության բարձրացումն է, իրավական կարգավորում չունեցող իրավիճակների բացառումը: Այս հարցում մենք սերտորեն համագործակցում ենք բոլոր անդամ պետությունների հետ և աշխատում կոնսենսուսային լուծում գտնելու ուղղությամբ: Ընդ որում ընդգծեմ, որ կառույցը մեր գնահատմամբ անկախ ամենից բնականոն և արդյունավետ աշխատում է, պետությունների սերտ համագործակցությամբ, և քարտուղարությունն անխափան իրականացնում է իր պարտականությունները:

Հարց. Ստանիսլավ Զասը նաև հույս էր հայտնել հանդիպել Հայաստանի վարչապետի հետ: Արդյո՞ք Երևանը նախատեսում է նման հանդիպում:

Աննա Նաղդալյան. Մենք համագործակցության ոգով ենք տրամադրված, և երբ կհստակեցվեն Բելառուսի Ազգային անվտանգության խորհրդի քարտուղար Ստանիսլավ Զասի այցի պահը, ժամկետները և կազմակերպչական մանրամասները, հանրությունն այդ մասին անպայման տեղյակ կպահվի: Բելառուսի հետ ունենք բավականին հագեցած օրակարգ, որի անբաժանելի մասն են կազմում երկկողմ փոխայցելությունները:

Հարց. Սիրիա ուղարկված հումանիտար առաքելությունը քննադատության արժանացավ ԱՄՆ-ի գործընկերների կողմից: Այս առումով հնարավո՞ր համարում եք երկկողմ հարաբերություններում լարվածության առաջացում:

Աննա Նաղդալյան. Հայաստանի համար մեծ նշանակություն ունի Սիրիայում տիրող իրավիճակը, ոչ միայն այն առումով, հատկապես որ հարցը վերաբերում է տարածաշրջանային խաղաղությանը և կայունությանը, բայց և հատկապես այն առումով, որ մենք ընդգծված անհանգստություն ունենք քաղաքացիական բնակչության և մեր հայրենակիցների առջև առաջացած մարտահրավերների առումով: Հայաստանը մշտապես սատար է կանգնել մեր հայրենակիցներին: Հենց այդ պրիզմայով պետք է գնահատել Հայաստանի կողմից Սիրիայի ժողովրդին ցուցաբերած մարդասիրական օգնությունը մեր հայրենակիցներին և այդ ճգնաժամի արդյունքում ձևավորված խոցելի խմբերին:

Այս գործընթացում Հայաստանն առաջնորդվում է միջազգային մարդասիրական իրավունքով և իր գործունեությունը համակարգում է տեղում մարդասիրական օգնություն ցուցաբերող կառույցների և միջազգային գործընկերների հետ: Ինչպես գիտեք, կա համապատասխան կոնտակտային անձ, ով նստում է ՀՀ Գլխավոր հյուպատոսությունում։ Մենք այսօր մեր փոքր ներդրումն ենք ցանկանում ունենալ տեղի քաղաքացիական բնակչության՝ բնականոն կյանքին վերադառնալու համար պայմանների ստեղծման գործում:

Այս ուղերձը, որը ես նշեցի, փոխանցում ենք նաև մեր գործընկերներին, ներկայացնում ենք մեր մարդասիրական առաքելությունը, և մեր գործընկերների հետ շարունակում ենք աշխատանքներն այս ուղղությամբ:

Հարց. ՌԴ լրատվամիջոցների կողմից վերջին օրերին ակտիվորեն քննարկվում էր Երևանում գունավոր հեղափոխություններին տեխնոլոգիաներ սովորեցնող սեմինարի անցկացումը, որում ակտիվ դերակատարություն ուներ նաև «Իմ քայլի» պատգամավոր Միքայել Զոլյանը: Արդյո՞ք պաշտոնական Երևանը տեղյա՞կ էր նման սեմինարի անցկացման մասին:

Աննա Նաղդալյան. Այս առումով պետք է նշել, որ բնականաբար Հայաստանի վերաբերյալ միջազգային մամուլում տեղ գտած նյութերը մշտապես գտնվում են մեր ուշադրության ներքո:

Քաղաքացիական հասարակության, ոչ կառավարական կազմակերպությունների կողմից միջոցառումների կազմակերպումը մեր օրենսդրության համաձայն որևէ կերպ չի վերահսկվում պետության կողմից, և այս միջոցառման բնույթի և քննարկված թեմաների մասին մասնակիցների և կազմակերպիչների կողմից բավական պարզաբանում արդեն իսկ տրվել է:

ՀՀ ԱԳՆ