Վարչապետ Նիկոլ Փաշինյանը Մարտի 8-ի առթիվ այսօր դուրս եկավ կառավարության շենքից ու փոքր-ինչ շրջեց՝ զամբյուղից ձնծաղիկ-մանուշակներ բաժանելով եւ շնորհավորելով կանանց: Նրան միանգամից շրջապատեցին քաղաքացիները՝ լուսանկարվելու ակնկալիքով: «Մի րոպե, մի անցեք, ձեզ էլ շնորհավորեմ»,-մինչ կանայք փորձում էին «սելֆի» անել, ձայնում էր նա մյուս կանանց: Ապա` նա հարցրեց. «Ի՞նչ եք մտածում ՀՀ-ում կանանց իրավունքների պաշտպանության մասին»: Կանանցից մեկը դժվարացավ պատասխան տալ, մյուսն էլ դժգոհեց, որ պետական աշխատավայրերում տղամարդ-կին տարբերակում կա. «Անգամ եթե կինը լավ մասնագետ է, տղամարդուն են առաջնայնություն տալիս»:
Փաշինյանը հարցրեց. «Ձեր կարծիքով, ի՞նչ պետք է անի կառավարությունը, որպեսզի կանանց իրավունքների պաշտպանության ոլորտում առաջընթաց ունենանք»: Կանանցից մեկն արձագանքեց. «Խրախուսի, որ աշխատավայրերում հավասարություն լինի: Երեւի օրենսդրական փոփոխություններ են պետք»: Մի կին էլ, որը ներկայացավ որպես մանկապարտեզի տնօրեն, ասաց, որ աշխատավարձի բարձրացում են ակնկալում. «55 000 դրամ ենք ստանում»: Փաշինյանն այնուհետեւ նշեց. «Կարծում եմ՝ լավ կլինի, որ կանայք ակտիվ լինեն հանրային-պետական կառավարման համակարգում: Վերջերս աշխատանքային նախաճաշ եմ ունեցել IT ոլորտի առաջատարների հետ, որոնցից մեկն էր միայն կին: Գլխավոր ուղերձն այն է, որ կանայք պետք է նախաձեռնող լինեն: Ես, օրինակ, նշանակումների ժամանակ նախընտրում եմ առավելությունը տալ կին-թեկնածուին»: Աղջիկներից մեկը միացավ քննարկմանը. «Միեւնույնն է՝ տղամարդկանց կարծիքը չի փոխվել, նրանք թույլ չեն տալիս, որ կանայք առաջ գնան: Դա հայի մտածելակերպ է»:
«Այսօր տղամարդկանց հետ չեմ շփվում»,-կատակեց Նիկոլ Փաշինյանը, երբ մի տղամարդ ցանկացավ նրան ասել, որ ինչ-որ բան է ուղարկել իրեն: Մի կնոջ էլ եղբայրը զանգահարել էր եւ հայտնել, որ Փաշինյանը կառավարության դիմաց է: Կինն Ամիրյան փողոցից շտապել էր եւ հասցրել բարեւել վարչապետին: «Ազի՜զ, ուզում եմ նկարվեմ, որ երեխեքս տեսնեն, Մոսկվա են»,-այսպես դիմեց մի տատիկ Նիկոլ Փաշինյանին: «Ասում եմ՝ եկեք, չեն ուզում: Ասում են, որ ՀՀ-ն վատ վիճակում է: Ես էլ ասում եմ, որ ոչ»,-անկեղծացավ տատիկը: Վարչապետին այդպես էլ չհաջողվեց կանանց իրավունքների վերաբերյալ բովանդակային քննարկում ծավալել. անցորդների «սելֆիները» չափազանց շատ էին: «Աննա, արի մի քիչ թեթեւացու»,-նկատի ունենալով «սելֆիների» առատությունը՝ կատակով այսպես դիմեց կնոջը Նիկոլ Փաշինյանը:
Լուիզա ՍՈՒՔԻԱՍՅԱՆ
