Յուրահատուկ բարձրակարգ մթերքներ արտադրող եւ վաճառող «Լա մեզոն ռուժ» բուտիկը, որը հասցրել է սիրվել մաքուր եւ առանց քիմիական հավելումների սնունդ նախընտրողների շրջանում, մոտ մեկ ամիս առաջ բադի մագղեի՝ բադի ապխտած կրծքամսի օգտագործմամբ աղցանի պատրաստման մրցույթ էր հայտարարել Ֆեյսբուքի օգտատերերի շրջանակում:
Մոտ 20 բաղադրատոմսերի միջից երեք բաղադրատոմս, որոնց հեղինակներն էին երեք ոչ պրոֆեսիոնալ խոհարարներ՝ մասնագիտությամբ բժիշկ Սուսաննա Վարդանյանը, թարգմանիչ Ռուզաննա Ենգիբարյանը եւ լրագրող Մելանյա Բարսեղյանը, հայտնվել էին եզրափակիչում, եւ կանանց տոնի նախօրյակին «Լա մեզոն ռուժ» բուտիկի «Լաֆայեթ» ռեստորանում կայացավ եզրափակիչ փուլը: Նրանք տեղում պատրաստեցին իրենց աղցանները:
Ժյուրին՝ հանձին «Լա մեզոն ռուժի» հիմնադիր Ալեն Թուադյանի եւ «Լաֆայեթ» ռեստորանի շեֆ-խոհարար Տիգրան Հակոբյանի, գնահատեց աղցանները՝ արտաքին տեսքի, համի եւ պատրաստման տեխնիկայի առումներով:
«Առավոտի» խոհարարական բլոգի հեղինակ Մելանյա Բարսեղյանի առաջարկած աղցանը, որի բաղադրատոմսը առաջիկա կիրակի կներկայացվի մեր ընթերցողներին, 1-ին տեղը գրավեց:
Նկատենք, որ «Լա Մեզոն Ռուժ բուտիկի» արտադրանքները 100% բնական են և չեն պարունակում կոնսերվանտներ, հավելումներ և գունավորիչներ: Հատկապես կարևոր է նշել, որ «Լա մեզոն ռուժի» մսամթերքի տեսականին պատրաստված է առանց նիտրիտների և նիտրատների։
