Այսօր կառավարության նիստին հավանություն տվեց կառավարության կառուցվածքի եւ գործունեության մասին օրենքում փոփոխություններ կատարելու մասին նախագծին: Այսինքն` կառավարությունը որոշեց օպտիմալացնել կառավարության կառուցվածքը եւ կրճատել նախարարությունների թիվը:
Ըստ այդմ՝ այսուհետ մշակույթի եւ սպորտի նախարարությունները «անցան» կրթության եւ գիտության նախարարությանը, էներգետիկայի եւ բնական պաշարների նախարարությունը՝ տարածքային կառավարմանը, որն այսուհետ կոչվելու է տարածքային կառավարման եւ ենթակառուցվածքների նախարարություն: Առողջապահության, արդարադատության, աշխատանքի եւ սոցիալական հարցերի եւ արտակարգ իրավիճակների նախարարությունները նույնությամբ մնացին, իսկ բնապահպանության նախարարության անունը փոխվեց. այն վերանվանվեց շրջակա միջավայրի նախարարություն: Կառավարությունը որոշեց գյուղատնտեսության նախարարությունն ու տնտեսական զարգացման եւ ներդրումների նախարարությունները «միաձուլել» եւ վերանվանել էկոնոմիկայի նախարարություն:
Կառավարության այս որոշմամբ սփյուռքի նախարարությունը միացվեց վարչապետի աշխատակազմին, որը կոչվելու է Սփյուռքի գործերի գլխավոր հանձնակատարի գրասենյակ: Տրանսպորտի, կապի եւ տեղեկատվական տեխնոլոգիաների նախարարությունը անվանափոխվեց բարձր տեխնոլոգիաների եւ արդյունաբերության նախարարություն:
Այս որոշման քննարկման ժամանակ առողջապահության նախարար Արսեն Թորոսյանն առաջարկեց սննդի անվտանգության ծառայությունը «վերադարձնել» առողջապահության նախարարությանը, քանի որ այն գյուղնախին տալը եւ այժմ էլ էկոնոմիկային փոխանցելը սխալ է:
Որոշումն ընդունելուց հետո վարչապետ Փաշինյանն ասաց, որ այս օպտիմալացման գործընթացում փակ աչքերով եւ կույր կրճատումներով չեն առաջնորդվելու: «Կադրային ջարդ չենք ունենա, բայց այո, կրճատումներ լինելու են»,- ասաց վարչապետը: Նա հորդորեց յուրաքանչյուր աշխատակցին՝ վերանայել իր աշխատանքի որակը:
Վարչապետն անդրադառնալով պարգեւավճարների թեմային, ասաց՝ լավ է,որ այդ պարգեւավճարներից սկանդալները ծագում են, բայց դրանք լինում են այն պատճառով, որ նախկինում վճարման այլընտրանքային մեխանիզմներ էին գործել, որոնք այլեւս չկան և, ըստ էության, բարձր որակավորում ունեցող մասնագետների արտահոսք էր լինում: Վարչապետը կրկին նշեց, որ օպտիմալացման ընթացքում կրճատումները պետք է լինեն մաքսիմալ շրջահայաց եւ օբյեկտիվ:
Նելլի ԲԱԲԱՅԱՆ
