«Եթե պարզվի, որ արդյունք չստեղծող մարդիկ կան, նրանցից պետք է ազատել: Գերանդին չենք առնելու եւ «հնձելու» պետական կառավարման համակարգը: Կրճատումները կլինեն նվազագույն չափի»,-ԱԺ-կառավարություն հարցուպատասխանի ժամանակ այսօր անդրադառնալով կառավարության օպտիմալացմանը, մասնավորապես՝ նախարարություններում սպասվող կրճատումներին, ասաց ՀՀ վարչապետ Նիկոլ Փաշինյանը:
Նա նշեց, որ կկրճատվեն նախարարությունների կրկնվող օղակների աշխատակիցները. «Երկու նախարարության իրավաբանական վարչության պետերը չեն կարող միաժամանակ աշխատել օպտիմալացման արդյունքում: Բարձր որակավորման իրավաբանը կամ հաշվապահը աշխատանք գտնելու խնդիր չունի, նման մասնագետների անհրաժեշտություն կա աշխատաշուկայում: Չկրկնվող հաստիքների աշխատակիցները չեն կրճատվի եւ հնարավորություն կստանան ապացուցելու, որ կարող են նոր չափանիշներով աշխատել»:
Լուիզա ՍՈՒՔԻԱՍՅԱՆ
