ԱԺ-կառավարություն հարցուպատասխանի ժամանակ այսօր «Լուսավոր Հայաստան» խմբակցության պատգամավոր Անի Սամսոնյանը հնչեցրեց ՌԴ-ի կողմից թալիշական ազգային շարժման առաջնորդ Ֆահրադին Աբոսզոդային Ադրբեջանին հանձնելու եւ նրա կյանքին վտանգ սպառնալու խնդիրները:
Հիշեցնենք, որ նա Ռուսաստանից քաղաքական ապաստան էր հայցում, սակայն օրերս ձեռնաշղթաներով հանձնվեց Բաքվին: «Նա այցելել էր ՀՀ, թալիշներին կոչ արել չմասնակցել ապրիլյան ռազմական գործողություններին, քաղաքական ապաստան խնդրել ՀՀ-ից: Ի՞նչ քայլեր է ձեռնարկել ԱԳՆ-ն՝ ՌԴ-ի հետ այդ խնդրի ուղղությամբ բանակցելու համար եւ ինչո՞ւ ՀՀ-ն չկարողացավ քաղաքական ապաստան տրամադրել»,-հարցրեց Անի Սամսոնյանը:
ԱԳ նախարար Զոհրաբ Մնացականյանը պատասխանեց, որ հարցն առաջնահերթ մարդու իրավունքների տիրույթում է. «Երկու երկրներ իրավական հիմքեր են օգտագործել՝ նման որոշում ընդունելու համար: Կշարունակենք ուշադրություն դարձնել՝ մարդու իրավունքների համատեքստում: Դեպքը մտահոգիչ է: Առաջին անգամ չէ, երբ փոքրամասնությունները հալածվում են»: Անի Սամսոնյանը պնդեց հարցը՝ «Ինչո՞ւ ՀՀ-ն չկարողացավ բանակցել ՌԴ-ի հետ, որը Ֆահրադին Աբոսզոդային թաքուն տրամադրեց Ադրբեջանին»: Մնացականյանը պատասխանեց. «Ես ուշադիր լսեցի ձեր քննադատությունը, բայց պատասխանելու համար ավելի մանրամասն պետք է խնդիրն ուսումնասիրեմ: Կրկնում եմ՝ խնդիրը միակը չէ եւ շարունակելու է մնալ մեր ուշադրության կենտրոնում»:
Լուիզա ՍՈՒՔԻԱՍՅԱՆ
