Ազգային ժողովի փոխնախագահ Լենա Նազարյանն այսօր ԱԺ-կառավարություն հարցուպատասխանի ժամանակ Պաշտպանության նախարար Դավիթ Տոնոյանի ուշադրությունը հրավիրեց հետեւյալ խնդրի վրա. «Ինձ դիմել է դասակի հրամանատար, որը գտնվում է երեխայի խնամքի արձակուրդում, միայնակ է խնամում, ցանկանում է վերադառնալ աշխատանքի: Նա ապրում է Մեծամորում, բայց աշխատավայրը գտնվում է Լուսակերտում: Դուք նրան առաջարկել եք զորամասին մոտ բնակարան, բայց խնդիրն այն է, որ գտնվելով ներկայիս բնակարանից հեռու՝ չի կարող համատեղել երեխայի խնամքն ու աշխատանքը, քանի որ օգնող չունի: Նա միայնակ մայր է: Եթե կան կին աշխատակիցներ, ապա նաեւ՝ երեխաներ: Պետությունն ի՞նչ է նախատեսում այս ուղղությամբ»:
Ապա` Լենա Նազարյանը նշեց, որ մի շարք երկրներում, օրինակ, պետությունը կին-զինծառայողի համար դայակի գումար է տրամադրում կամ երեխայի խնամքի սենյակ՝ աշխատավայրում:
Դավիթ Տոնոյանն այսպես արձագանքեց. «Կանեմ ամեն ինչ, որպեսզի հարցին լուծում տրվի: Ըստ երեւույթին, ծառայության վայրի՝ զորամասի տեղափոխություն է եղել, որից առաջացել է այդ խնդիրը»:
Նախարարը նաեւ հայտնեց, որ աշխատում են բանակում կանանց ներգրավվածության մեծացման ուղղությամբ. «Հավելավճարներ չկան, բայց այդ առնչությամբ ձեր առաջարկը լավն է»:
«Կանայք երեխաներ ունենալու առանձնահատկություն ունեն»,-եզրափակեց Լենա Նազարյանը: Նրա այս նախադասությունը դահլիճում ներկա պատգամավորների ծիծաղն առաջացրեց:
Լուիզա ՍՈՒՔԻԱՍՅԱՆ
