«Սերգեյ Բագրատյան, ճիշտ կլիներ ձեր փաստերը ներկայացնեիք Հատուկ քննչական ծառայությանը: Եթե փաստեր չունեք, խնդիրը համարենք լուծված»,-ԱԺ-ում այսօր հայտարարեց «Իմ քայլը» խմբակցության պատգամավոր Վահագն Հովակիմյանը՝ անդրադառնալով ԲՀԿ պատգամավոր Սերգեյ Բագրատյանի երեկվա հայտարարությանը, թե 2018թ. ԱԺ արտահերթ ընտրությունների ժամանակ բանակը եւ ոստիկանությունը հրահանգավորված քվեարկել են «Իմ քայլի» օգտին: «Ընտրությունների որակը մեծապես որոշում է ոչ թե օրենսդրությունը, այլ քաղաքական կամքի դրսեւորումը, ինչը եւ եղավ»,-համոզմունք հայտնեց Վահագն Հովակիմյանը:
Սերգեյ Բագրատյանն էլ իր ելույթում պնդեց մոտեցումը. «Թերություններ այլեւս չպետք է կրկնվեն: Իմ առաջարկն այն է, որ սպան զինվորից հիսուն մետր հեռավորության վրա պետք է քվեարկի»:
ԱԺ նախագահ Արարատ Միրզոյանն էլ իր հերթին վստահեցրեց. «Բոլոր ջանքերը գործադրել ենք, որպեսզի ապօրինություններ չլինեն մեր քաղաքական ուժի օգտին: Եթե ինչ-ինչ տեղերում խախտումներ են եղել, մենք ունենք անկախ իրավապահ համակարգ, որին պետք է դիմել»:
Վահագն Հովակիմյանն իր ելույթում նաեւ իրավապահներին անդրադարձավ. «Իրավապահ համակարգն իր ողջ ներուժով ընտրությունների ընթացքում իր պարտքը կատարել է: Նախորդ ընտրությունների ամենամեծ խնդիրն այն էր, որ իրավապահների դերը ընդդիմությունն էր կատարում, իսկ այս անգամ իրավապահները կատարեցին օրենսդրությամբ սահմանված գործառույթները: Այլեւս այդպես է լինելու: Որեւէ մեկն իրավապահ համակարգի ոչ թեւերն է կտրելու, ոչ բերանը փակելու»:
Լուիզա ՍՈՒՔԻԱՍՅԱՆ
