ԱԺ-ն այսօրվա նիստում առաջին ընթերցմամբ քննարկեց «Կրթության մասին օրենքում փոփոխություններ կատարելու մասին օրենքի նախագիծը», որը հեղինակել է ԲՀԿ պատգամավոր Տիգրան Ուրիխանյանը: Նախագիծը ենթադրում է ուսան վարձի վճարման կարգի փոփոխություն: «Վճարովի բուհերում ուսանողները հնարավորություն ունենան ուսման վարձը ոչ թե միանվագ կամ տարին երկու անգամ վճարել, այլ ամսական կտրվածքով: Այս դահլիճում էլ կան նախկին ուսանողներ, որոնց պարագայում այս խնդրի պատճառով բուհերը դադարեցրել են նրանց հետ պայմանագիրը, եւ նրանք չեն կարողացել բուհ ավարտել: Հարյուրավոր դիմում-նամակներ եմ ստացել ուսանողների կողմից, որոնք կարեւորում են այս օրինագիծը»,-հայտարարեց Տիգրան Ուրիխանյանը:
Նա նշեց. «Եթե կասկածող կա, կարող եմ այս ամբիոնից դադարեցված պայմանագրեր եւ հեռացված ուսանողների անուններ ասել»:
Պատգամավորի պնդմամբ՝ ուսանողները գործող կարգավորմամբ հնարավորություն ունեն դիմել բուհի ղեկավարությանը եւ ստանալ թույլտվություն՝ վարձը ամսական կտրվածքով վճարելու, սակայն Ուրիխանյանի տեղեկություններով՝ որոշ բուհերի ղեկավարություններ չեն համաձայնում՝ մի շարք պատճառներով:
Պատգամավորը նաեւ վստահեցրեց, որ որոշ բուհերի ղեկավարներ սրտնեղել են օրենքից բխող հնարավոր հաշվապահական խնդիրներից, սակայն Տիգրան Ուրիխանյանը կարծում է, որ դրանք ժամանակավոր են:
«Իմ քայլը» խմբակցության պատգամավոր Մխիթար Հայրապետյանն էլ կարեւորեց նախագիծը՝ այն որակելով «ուսանողակենտրոն», սակայն մտահոգություններ էլ մատնանշեց. «Բուհերի ինքնավարության եւ ֆինանսական խնդիրներ են հնարավոր: Արդյոք այսպես չենք միջամտո՞ւմ բուհերի ներքին գործերին եւ արդյոք ֆինանսական կառավարման դժվարություններ չե՞ն առաջանա: Կարծում եմ՝ այդ մտահոգությունները փարատված են»:
Նշյալ օրենքի նախագծի քվեարկությունն ԱԺ-ում տեղի կունենա վաղը:
Լուիզա ՍՈՒՔԻԱՍՅԱՆ
